Deputat: Azərbaycan Macarıstanın enerji təminatında həlledici rola malikdir
Bakı, 21 avqust, AZƏRTAC
Azərbaycan və Macarıstan arasında tarixi dostluq əlaqələri ölkəmizin müstəqillik əldə etməsindən sonra strateji səviyyəyə keçib və Ulu Öndər Heydər Əliyevin bu ölkə ilə sıx tərəfdaşlığı dərinləşdirən müdrik siyasəti münasibətlərin qardaşlıq səviyyəsinə yüksəlməsini təmin edib.
Bunu AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov bildirib. O qeyd edib ki, Macarıstanın daxil olduğu Şərqi Avropa regionu ölkəmizin xarici siyasətinin mühüm prioritet istiqamətlərindən birini təşkil edir və bu bölgə son illər ən iri enerji hubunu təşkil etməkdədir. Bu baxımdan Azərbaycan Macarıstanla əməkdaşlıq üçün daha yeni imkanlar açıb. Əlaqələr intensivləşib. Bu xüsusda Azərbaycan Prezidenti İlham Əliyevin Macarıstana, eləcə də Macarıstanın dövlət başçısının ölkəmizə qarşılıqlı səfərləri strateji münasibətlərin arxitekturasını daha da möhkəmləndirib. Macarıstan Azərbaycanın Avropa İttifaqında ən yaxın və etibarlı tərəfdaşına çevrilib.
Milli Məclisin deputatı qeyd edib ki, Azərbaycan-Macarıstan münasibətləri son illər yeni mərhələyə qədəm qoyub. Azərbaycan Prezidentinin bu ölkəyə son illərdəki səfəri zamanı imzalanmış Strateji tərəfdaşlıq haqqında Birgə Bəyannamə ilə siyasi münasibətlər keyfiyyətcə yeni müstəviyə qalxıb. Onun sözlərinə görə, ötən illərdə iki ölkə arasında 50-dən çox sənəd imzalanıb ki, bu vacib sənədlər qarşılıqlı maraq doğuran sahələrdə həm ikitərəfli formatda, həm də beynəlxalq aləmdə iki ölkə arasında əməkdaşlığı dərinləşdirmək məqsədilə strateji tərəfdaşlığa daxil olduqlarını bəyan ediblər. Bu sazişlər iqtisadi əlaqələrin dinamikasını da yüksəldib və əmtəə dövriyyəsi hər il artır.
A.Hüseynov əlavə edib ki, 2022-ci ildə Bolqarıstan Azərbaycanın 28-ci xarici ticarət tərəfdaşı olub. Həmin ildə iki ölkə arasında ticarət dövriyyəsi 45 milyon dollar təşkil edib. Ancaq bu ticarət saldosu iki ölkə arasında mövcud iqtisadi potensialı tam əhatə etmir və tərəflər ticarət dövriyyəsini artırmaq niyyətindədir. Bunun üçün imkanlar çox genişdir.
“Azərbaycan Avropa regionu ölkələrinin enerji təhlükəsizliyinin təmin edilməsində mühüm rol oynayır. Bu ölkə Cənub Qaz Dəhlizi ailəsinin üzvüdür, Azərbaycan təbii qazını Avropaya nəql edən TAP kəməri Macarıstanın da enerji təminatında əsas mənbələrdən biridir. Bu kəmərlə ildə Macarıstana ən azı 1 milyard kubmetr təbii qazın verilməsi nəzərdə tutulur. Ötən il Bolqarıstanın “Bulgartransgaz”, Rumıniyanın “Transgaz”, Macarıstanın FGSZ, Slovakiyanın “Eustream” və Azərbaycanın Dövlət Neft Şirkəti arasında əməkdaşlığın təşviqi ilə bağlı Anlaşma Memorandumu”nun imzalanması mərasimi keçirilib ki, bu da Macarıstanın enerji təminatında həlledici rol oynayır.
Macarıstan həm də türk dövlətləri ailəsinin üzvü kimi türk coğrafiyasının iqtisadi-siyasi həyatında da fəal siyasət yürüdür. Bu ölkə Türk Dövlətləri Təşkilatında müşahidəçi qismində təmsil olunur. TDT-nın Macarıstanda rəsmi nümayəndəliyi fəaliyyət göstərir. Macarıstan Azərbaycanın işğaldan azad olunmuş ərazilərində aparılan yenidənqurma və iqtisadi inkişaf layihələrində yaxından iştirak etmək niyyətini də bəyan edib”, - deyə deputat bildirib.
Bölmənin digər xəbərləri
