SİYASƏT
Deputat: Qərbin maliyyələşdirdiyi bəzi təşkilatların əsas məramı pozucu donor funksiyasını yerinə yetirməkdir
Bakı, 2 aprel, AZƏRTAC
Azərbaycan dünya miqyasında siyasi və iqtisadi müstəqilliyinə nail olunmuş çox az ölkələrdəndir. İqtisadi müstəqilliyimiz ölkəmizin xarici mənbələrdən asılılığını aradan qaldırıb və döyüş meydanında olduğu kimi, siyasi meydanda da söz sahibinə çevirib. Bugünkü Azərbaycanı 1990-cı illərdəki vəziyyəti ilə müqayisə etmək özü-özünü aldatmaqdan başqa bir şey deyil. Lakin təəssüf ki, Qərbin maliyyələşdirdiyi bəzi təşkilatlar Azərbaycana qədəm qoyduğu 1990-cı illərin abı-havasında qalmaqdadır. Onlar hətta maliyyə yardımları pərdəsi altında siyasi proseslərə təsir etmək mövqeyindən çəkinmirlər. Odur ki, dövlətimiz inkişaf etdikcə Qərbin pozuculuq fəaliyyəti ilə məşğul olan bir çox təşkilatlarının ölkəmizdə fəaliyyətinə qadağa qoyulub. Çünki həmin təşkilatlar vətəndaş cəmiyyətinə yardım adı altında 5-ci kolon şəbəkəsini yaradır. Eyni zamanda, dövlətin qazandığı uğurlara kölgə salmaq məqsədilə ölkədə siyasi sabitliyi pozmağa çalışırlar. Uzun illər ABŞ və Avropanın bir çox siyasi institutları, maliyyə fondları, hüquq-müdafiə təşkilatları Azərbaycanda məhz bu istiqamətdə fəaliyyət göstəriblər. Belə qurumlara USAID, Milli Demokratiya İnstitutu, “Fridrix Nauman”, “Marşall”, IREX və digərləri misal göstərmək olar. Bu cür təşkilatlar Azərbaycan dövləti ilə müəyyən istiqamətlərdə əməkdaşlıq etsələr də, onların əsas fəaliyyət istiqaməti özlərinə sadiq qeyri-hökumət təşkilatları, media qurumları yaratmaq, özünəməxsus şəbəkə formalaşdırmaq, radikal siyasi qüvvələrin antidövlət fəaliyyətinə dəstək vermək olub.
Bu fikirləri Milli Məclisin deputatı Azər Badamov AZƏRTAC-a açıqlamasında bildirib.
USAID-in bu gün də ölkəmizdə fəaliyyətini davam etdirdiyini vurğulayan deputat buna lüzum görmədiyini qeyd edib: "USAID ABŞ Mərkəzi Kəşfiyyat qurumunun alt qolu kimi yaradılıb və hazırda yardım adı altında ayrı-ayrı ölkələrin daxili işlərinə aktiv şəkildə müdaxilə etməklə məşğuldur. Hər il ABŞ Federal büdcəsinin təxminən 1 faizinin həmin təşkilatın proqramlarının maliyyələşdirilməsinə ayrıldığı bildirilir. USAID dünyanın gözünə yüzdən çox ölkədə iqtisadiyyatın və demokratiyanın inkişafı, səhiyyə, münaqişələrin qarşısının alınmasına kömək və təcili humanitar yardımın göstərilməsi ilə məşğul olduğu külünü üfürsə də, əsas məramı pozucu donor funksiyasını yerinə yetirməkdir. Təcrübə göstərir ki, başda USAID olmaqla ABŞ hökumətinə bağlı olan, eləcə də guya müstəqil olan bu cür təşkilatlar vətəndaş cəmiyyətlərinin inkişafına töhfə verməkdən daha çox, siyasi proseslərə müdaxilə etmək, cəmiyyəti çaşdırmaq, ictimai-siyasi prosesləri manipulyasiya etmək, dövlətçilik prinsiplərini zəiflətmək məqsədi güdürlər. Təbii ki, Qərbin müxtəlif institutlar vasitəsilə xərclədiyi maliyyənin hər dollarının məqsədi var. Əlbəttə ki, onlar üçün ehtiyacı olan ölkələrə yardım göstərmək əsas məqsəd olmayıb. Əsl hədəf sadəcə yardım pərdəsi adı altında özlərinin siyasi maraqlarını reallaşdırmaq və xərclədiklərinin bir neçə dəfə artığını qazanaraq orada söz sahibinə çevrilməkdir".
A.Badamov bildirib ki, ABŞ və Avropanın bir çox siyasi institutları, maliyyə fondları, hüquq-müdafiə təşkilatlarının yardım götərdikləri ölkələrin əksəriyyətində siyasi-iqtisadi mühitin necə məhv edildiyini görməmək mümkün deyil. Həmin institutların siyasi texnoloqları "kömək etdikləri" ölkələrin qazandıqları uğurları məhv etmək üçün demokratiya, insan hüquqları və vətəndaş cəmiyyətinə guya dəstək göstərdikləri imicini formalaşdıraraq özlərinin çirkin niyyətlərinə nail olublar. Belə ölkələr dövlət çevrilişlərinə, vətəndaş müharibələrinə məruz qalıblar və cəhənnəmə çevriliblər. Təbii ki, həmin proseslər Azərbaycanda baş tutmayıb və bundan sonra da reallaşmayacaq. Çünki ölkəmizdə yüksək dövlət-vətəndaş birliyi var və pozuculuq fəaliyyəti ilə məşğul olan belə qurumların fəaliyyətinə imkan yaradılmır.
"Düşünürəm ki, ölkəmizdə USAID-in də fəaliyyətinin dayandırılmasının vaxtı çatıb. Ona görə ki, hazırda donor ölkəsinə çevrilən Azərbaycan yardıma ehtiyacı olan ölkələrə yardımlar göndərir. Bu gün Azərbaycan dövlətinin vətəndaş cəmiyyəti ilə yüksək səviyyəli şəffaf əməkdaşlığı mövcuddur və xarici mənbələrdən maliyyə asılılığı aradan qaldırılıb. Qısacası, Azərbaycanın Qərbin bəd məqsədli yardımlarına ehtiyacı yoxdur. Belə yardımların düzgün ünvanı Ermənistan kimi ehtiyacı olan ölkələrdir", - deyə A.Badamov qeyd edib.