DÜNYA
Dərman qəbulu zamanı qəhvə içmək olmaz
Bakı, 11 yanvar (AZƏRTAC). Qəhvə - bir çox insanların hər səhər içdiyi sevimli, gümrahlaşdırıcı içkidir. Lakin qəhvədən istifadə edərkən öz sağlamlığınıza diqqət yetirməlisiniz. Məsələ burasındadır ki, müəyyən xəstəliklərdə qəhvə sağlamlıq üçün zərərli ola bilər. Məsələn, tibb işçiləri dərman preparatlarının qəbulu zamanı bu ətirli içkidən çəkinməyi təkidlə tövsiyə edirlər. Sən demə qəhvənin və müxtəlif dərmanların paralel qəbul edilməsi preparatların həzmi sxeminə təsir göstərir.
İlk növbədə qəhvə ilə dərman preparatlarının qarşılıqlı təsirindən danışarkən nəzərə almaq lazımdır ki, kofein preparatın mənimsənilməsinə mənfi təsir göstərir. Bundan başqa, digər “qəhvə birləşmələri” də istifadə olunan dərmanlardakı aktiv maddələrlə reaksiyaya girə bilər. Aparılmış tədqiqatlar belə bir nəticə çıxarmağa əsas vermişdir ki, kofein antidepressantlar, estrogen əsaslı preparatlar, osteoporoza qarşı dərman preparatları, qalxanabənzər vəzinin hormon preparatları kimi dərmanların orqanizmə təsir prinsipini dəyişir.
Buna görə də xroniki xəstəliklərdən əziyyət çəkən və daim göstərilən qruplardan olan dərman preparatları qəbul edən adamlar qəhvədən istifadə edərkən çox ehtiyatlı olmalıdırlar.