DİM: İxtisas seçimi ərizəsini təsdiqləyənlərin sayı 59 minə çatır
Bakı, 17 avqust, AZƏRTAC
Ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi davam edir. Abituriyentlər avqustun 19-u saat 23:59-dək qəbul olmaq istədikləri ixtisasları “Abituriyentin (subbakalavrın) elektron ixtisas seçimi ərizəsi”nə daxil edib təsdiq etməlidirlər.
Dövlət İmtahan Mərkəzindən (DİM) AZƏRTAC-a bildirilib ki, avqustun 17-si saat 10:30-a olan məlumata əsasən, 58 min 850 abituriyent (subbakalavr) ərizəsini təsdiq edib. Müsabiqəyə yalnız ərizəsini təsdiq etmiş şəxslər buraxılırlar. Təsdiqlənmiş elektron ixtisas seçimi ərizələrinin qruplar üzrə bölgüsünə gəldikdə, I ixtisas qrupu üzrə 19 min 436, II qrup üzrə 13 min 953, III qrup üzrə 15 min 974, IV qrup üzrə 4 298, V qrup üzrə isə 7 512 ərizə təsdiqlənib.
Müsabiqədə iştirak edənlər “Abituriyentin (subbakalavrın) elektron ixtisas seçimi ərizəsi”nin doldurulma və təsdiq edilmə qaydası, müsabiqə şərtləri, ixtisas seçimi zamanı diqqət yetirilməli olan vacib məsələlər və digər suallarla bağlı ödənişsiz fəaliyyət göstərən “Abituriyent Məsləhət Mərkəzləri”nə müraciət edə bilərlər.
Qeyd edək ki, məsləhət mərkəzləri 10 ali təhsil müəssisəsində, DİM-in regional bölmələrinin yerləşdiyi şəhərlərdə, həmçinin müəyyən olunmuş tarixlər üzrə 50-dən çox bölgədə rayon təhsil sektorlarında fəaliyyət göstərir.
Bölmənin digər xəbərləri
