Divar boyasının açıq qutuları ətraf mühit üçün təhlükəlidir
Tallin, 13 yanvar, AZƏRTAC
Divar boyasının açıq qutuları ətraf mühit üçün təhlükəlidir.
AZƏRTAC Baltik ölkələrin mətbuatına istinadla xəbər verir ki, bunu Kral Kimya Cəmiyyətinin (“The Royal Society of Chemistry”) alimləri sübut ediblər.
Xarici mütəxəssislər bildiriblər ki, boyanın tərkibindəki polimerlər polietilen paketlər qədər ətraf mühit üçün zərərlidir: “Onlar uzun müddət Yerin səthində qalır və atmosferi çirkləndirir, həmçinin su təchizatı sistemində və qidada kök sala bilirlər”.
Tədqiqatçıların keçirdikləri sorğu nəticəsində müəyyən edilib ki, britaniyalı ailələr 50 milyon litrdən çox boya qalıqları saxlayır. Bu miqdar Londondakı Tauer körpüsünü 2,3 min dəfə rəngləmək üçün kifayət edər. Çox vaxt maddənin artığı zibilxanaya atılır və ya yandırılır, bu cür tullantıların yalnız iki faizi təkrar istifadə və ya emal olunur.
Tədqiqatçılar lak və boya məhsullarının alınması ilə bağlı ajiotajı koronavirus pandemiyası ilə əlaqələndirirlər, belə ki, insanlar evdə daha çox vaxt keçirməyə və mənzilin təmiri ilə məşğul olmağa başlayıblar.
Boyanın qalığının planetə vurduğu zərəri azaltmaq məqsədilə alimlər materialın lazımi miqdarını daha yaxşı hesablamağı və ya tullantıları təkrar emala təhvil verməyi məsləhət görüblər.
Asiman Əsədov
AZƏRTAC-ın xüsusi müxbiri
Tallin
Bölmənin digər xəbərləri
