Dohada Azərbaycanın Müstəqillik Günü qeyd olunub
Qahirə, 30 may, AZƏRTAC
Azərbaycanın Qətər Dövlətindəki səfirliyi ölkəmizin Müstəqillik Günü münasibətilə rəsmi qəbul təşkil edib.
AZƏRTAC xəbər verir ki, tədbirdə Azərbaycan Respublikasının İnsan hüquqları üzrə müvəkkili (Ombudsman) Səbinə Əliyeva, Qətərin dövlət qurumlarını təmsil edən bir sıra rəhbər şəxslər, o cümlədən əsas qonaq qismində Qətərin nəqliyyat naziri Şeyx Məhəmməd bin Abdulla bin Məhəmməd Al Tani, Xarici İşlər Nazirliyinin protokol idarəsinin rəisi İbrahim Faxro, Qətərin Şura Məclisində parlamentlərarası dostluq qrupunun üzvləri, Özbəkistan Respublikasının Milli İnsan Hüquqları Mərkəzinin direktoru, Özbəkistan Parlamentinin Qanunvericilik Palatasının sədr müavini Akmal Saadov, yerli ictimaiyyətin bir sıra nümayəndələri, ölkədə akkreditə olunmuş diplomatik korpusun rəhbərləri və diplomatları, iş adamları, nüfuzlu KİV təmsilçiləri və Qətərdə yaşayan azərbaycanlılar iştirak ediblər.
Ümumilikdə, builki Müstəqillik Günü ilə bağlı keçirilən tədbirə 65 səfir və müvəqqəti işlər vəkili qatılıb. Bundan əlavə, tədbirdə Qətərdəki Türk Hərbi Bazasının komandanı başda olmaqla yüksəkrütbəli zabitlər iştirak ediblər. Tədbirə qatılan qonaqların ümumi sayı 300 nəfərdən artıq olub.
Əvvəlcə hər iki ölkənin dövlət himnləri səsləndirilib. Tədbirdə Qətər Dövləti adından əsas qonaq kimi iştirak edən nəqliyyat naziri Şeyx Məhəmməd bin Abdulla bin Məhəmməd Al Tani bayram münasibətilə Azərbaycan Respublikasının Prezidentini və Azərbaycan xalqını təbrik edib.
Daha sonra çıxış edən Azərbaycan Respublikasının Qətərdəki səfiri Adış Məmmədov 107 bundan əvvəl, 1918-ci il mayın 28-də yaradılmış Azərbaycan Xalq Cümhuriyyətinin tarixi və əldə etdiyi mühüm nailiyyətləri barədə danışıb. Qeyd olunub ki, Sovet İttifaqının süqutundan sonra öz müstəqilliyini bərpa edən respublikamız bir çox qlobal və regional təşkilatlara, eləcə də Avropanın əsas siyasi institutlarına qoşularaq, beynəlxalq aləmdə öz yerini möhkəmləndirib.
Azərbaycan Respublikasının milli maraqlarının müdafiəsinə əsaslanan xarici siyasət xətti barədə danışan səfir onun yaradılmasının və həyata keçirilməsinin Azərbaycan xalqının Ümummilli Lideri Heydər Əliyevin adı ilə bağlı olduğunu qeyd edib.
Bundan başqa, ölkəmizin iqtisadi əlaqələri, yaşıl enerji və yeni nəqliyyat dəhlizlərinin inkişafı sahəsində fəaliyyəti barədə də məlumat verilib. Səfir son 20 ildə böyük iqtisadi nailiyyətlərin təşəbbüskarının Azərbaycan Respublikasının Prezidenti İlham Əliyev olduğunu bildirib.
A.Məmmədov Azərbaycan Respublikası ilə Qətər Dövləti arasında ikitərəfli münasibətlər barədə də danışıb.
Tədbir Azərbaycandan dəvət olunmuş xanəndə Günay İmamverdiyevanın rəhbərlik etdiyi muğam qrupunun ifasında xalq mahnılarının sədaları altında davam edib.
Tədbirdə, həmçinin Azərbaycanın tarixi, mədəniyyəti, iqtisadi inkişafı və uğurlarından, həmçinin Müstəqillik Gününün tarixindən bəhs edən, Bakı şəhərinin müasir və tarixi yerlərini özündə əks etdirən vidoçarxlar nümayiş olunub.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
