Doktorant və gənc tədqiqatçıların elmi konfransına müraciət qaydalarında dəyişiklik edilib
Bakı, 3 sentyabr, AZƏRTAC
Doktorantların və gənc tədqiqatçıların XXV respublika elmi konfransında iştirak üçün müraciət edə bilən şəxslərin siyahısında dəyişiklik olunub.
Bu barədə AZƏRTAC-a Təhsil İnstitutundan məlumat verilib. Bildirilib ki, Azərbaycanın və xarici ölkələrin elmi-tədqiqat və ali məktəblərində fəlsəfə doktoru proqramı üzrə təhsil alan doktorant və dissertantlardan əlavə olaraq doktorantura təhsilini bitirib müdafiəyə hazırlaşanlar və fəlsəfə doktoru elmi dərəcəsi almış elmi tədqiqatla məşğul olan 35 yaşınadək gənc alimin də iştirakına şərait yaradılacaq.
Konfransın elanı ilə tanış olmaq və ona müraciət etmək üçün ətraflı məlumat Təhsil İnstitutunun saytında yerləşdirilib.
Xatırladaq ki, konfrans noyabrın 23-24-də keçirəcək. Tədbirin keçirilməsində əsas məqsəd doktorantların və gənc tədqiqatçıların apardıqları elmi araşdırmaların nəticələrinin müzakirəsini təşkil etmək, habelə onların elmi yaradıcılığını stimullaşdırmaqdır. Konfrans riyaziyyat və təbiət elmləri, informasiya-kommunikasiya texnologiyaları və mühəndislik, sosial-humanitar elmlər sahələrini əhatə edəcək.
Bölmənin digər xəbərləri
