Dövlət Əmlakının İdarəedilməsi üzrə Dövlət Komitəsinin sədri KƏRƏM HƏSƏNOV Prezident İlham Əliyevin fərman və sərəncamları əsasında müəyyən edilmiş strategiyaya uyğun olaraq, dövlət əmlakının özəlləşdirilməsində şəffaflığın təmin edilməsi, özəlləşdirmə prosesinin səmərəliliyinin artırılması üçün görülən tədbirlər və nəzərdə tutulan planlar haqqında geniş məlumat verdi:

- Ulu öndərimiz Heydər Əliyev tərəfindən əsası qoyulmuş ölkəmizin inkişaf strategiyası bu gün də möhtərəm Prezidentimiz cənab İlham Əliyev tərəfindən uğurla davam etdirilməkdədir. Məhz bu siyasət nəticəsində Azərbaycan dünyanın dinamik inkişaf edən ölkələri səviyyəsinə çatmış, regionda lider dövlətə çevrilmişdir.

Cənab Prezident!

Sizin rəhbərliyinizlə ölkədə həyata keçirilən kompleks iqtisadi islahatların mühüm istiqamətlərindən biri dövlət əmlakının səmərəli idarə edilməsi və özəlləşdirilməsi, habelə bu sahəyə investisiyaların cəlbidir. Bu istiqamətdə dövlət siyasətinin səmərəliliyinin artırılması məqsədi ilə Sizin 2005-ci il 16 sentyabr tarixli Sərəncamınızla Dövlət Əmlakının İdarə Edilməsi üzrə Dövlət Komitəsi yaradılmışdır.

Möhtərəm Prezidentimizin qarşımıza qoyduğu əsas vəzifələr dövlət əmlakının idarə edilməsinin səmərəliliyinin artırılmasından, onun qorunub saxlanılması və mühafizəsindən, özəlləşdirmə prosesində şəffaflığın daha da artırılmasından, bu sahəyə investisiyaların cəlb edilməsi, özəlləşdirilən müəssisələrin fəaliyyətinin bərpası və inkişafından, investisiya qoyuluşlarına nəzarət edilməsindən ibarət olmuşdur.

Özəlləşdirmə qanunvericiliyinə əsasən, komitənin fəaliyyəti dövründə dövlət əmlakının idarə edilməsi, ondan təyinatı üzrə istifadə olunması və səmərəli özəlləşdirilməsi sahəsində ardıcıl tədbirlər görülmüşdür. Özəlləşdirmə tədbirləri Azərbaycan Prezidentinin təsdiq etdiyi digər sosial-iqtisadi inkişaf proqramları, o cümlədən regionların sosial-iqtisadi inkişafına dair Dövlət proqramı ilə sıx əlaqəli şəkildə həyata keçirilmişdir.

Möhtərəm Prezidentimizin son illər qəbul etdiyi ardıcıl sosial-iqtisadi inkişaf proqramlarının icrası, o cümlədən sahibkarlığın inkişafı və dövlət əmlakının özəlləşdirilməsi nəticəsində yeni istehsal müəssisələrinin yaradılmasına, qısa müddətdə yüz minlərlə yeni iş yerlərinin açılmasına nail olunmuşdur. Bu isə əhalinin gəlirlərinin artmasına, sosial rifahının yaxşılaşdırılmasına gətirib çıxarmışdır.

Azərbaycan Prezidentinin tapşırığına əsasən, ilk növbədə, dövlət əmlakının idarə edilməsi, özəlləşdirmənin sürətləndirilməsi, bu sahədə şəffaflığın və səmərəliliyin artırılması məqsədi ilə normativ hüquqi bazanın təkmilləşdirilməsi istiqamətində müvafiq işlər görülmüşdür. Belə ki, 30-dan artıq normativ hüquqi sənədin layihələri hazırlanmışdır. Onların bir qismi təsdiq edilmiş, digərləri isə aidiyyəti üzrə təqdim olunmuşdur. Bu sahədə “Dövlət əmlakının qorunub saxlanılması və səmərəli istifadə edilməsinin təkmilləşdirilməsi haqqında” Fərman imzalanmışdır. Həmin Fərmanla dövlət əmlakının idarə olunmasının təkmilləşdirilməsi üzrə Dövlət Proqramı və bir sıra normativ hüquqi aktlar təsdiq edilmişdir.

Eyni zamanda, özəlləşdirmənin səmərəliliyinin təmin edilməsi və dövlət büdcəsinə daxilolmaların artırılması məqsədi ilə özəlləşdirilən dövlət əmlakının qiymətləndirilməsi haqqında yeni Əsasnamə təsdiq olunmuşdur.

Komitənin fəaliyyəti dövründə dövlət əmlakının özəlləşdirilməsinin sürətləndirilməsi sahəsində bir sıra əməli tədbirlər həyata keçirilmişdir. Belə ki, ötən dövr ərzində ümumilikdə 4300 kiçik dövlət müəssisə və obyekti, qeyri-yaşayış sahəsi özəlləşdirilmişdir. Orta və iri dövlət müəssisələrinin bazasında 50 səhmdar cəmiyyəti yaradılmışdır. Onların səhmlərinin satışı üzrə 80 pul hərracı və 13 ixtisaslaşdırılmış çek hərracı keçirilmişdir. Pul hərraclarında 250, ixtisaslaşdırılmış çek hərraclarında isə 60-dan artıq səhmdar cəmiyyətinin səhmləri satılmışdır. Dövlət müəssisələrinin iştirakı ilə yaradılmış 2 birgə müəssisənin nizamnamə kapitalındakı dövlətin payı özəlləşdirilmişdir.

Azərbaycan Prezidentinin səhiyyə, təhsil, idman və mədəniyyət sahələrində bir sıra müəssisə və obyektlərin özəlləşdirilməsi haqqında müvafiq Sərəncamının icrasını təmin etmək məqsədi ilə tədbirlər həyata keçirilmişdir. Belə ki, həmin Sərəncamla özəlləşdirməyə açılmış 400-ə yaxın müəssisədən 100-ü artıq özəlləşdirilmiş, digərlərinin özəlləşdirilməsi ilə bağlı tədbirlər görülməkdədir.

760 müəssisə və obyektin yerləşdiyi dövlət torpaq sahəsi özəlləşdirilmişdir. Dövlət əmlakının satılmasına, hüquqi və fiziki şəxslərin mülkiyyət hüquqlarının əldə edilməsinə dair 5 minə yaxın şəhadətnamə verilmişdir. Bu dövr ərzində II Dövlət Proqramına uyğun olaraq həyata keçirilmiş özəlləşdirmə nəticəsində dövlət büdcəsinə təxminən 54 milyon manat vəsaitin ödənilməsi təmin olunmuşdur. Keçirilmiş çek hərracları, investisiya müsabiqələri və əmək kollektivlərinə güzəştli satış nəticəsində 1,3 milyon ədəd dövlət özəlləşdirmə çeki silinmişdir. Ümumilikdə, hazırkı tarixə özəlləşdirmə prosesində 15 milyon ədədə yaxın dövlət özəlləşdirmə çeki və 2 milyon ədəd dövlət özəlləşdirmə opsionu silinmişdir.

2007-ci ilin birinci yarısında 1200 kiçik dövlət müəssisə və obyekti özəlləşdirilmiş, 40-a yaxın səhmdar cəmiyyəti yaradılmışdır. 38 hərrac keçirilmiş, bunlarda 110 səhmdar cəmiyyətinin səhmləri satılmışdır. Cari ildə 367 müəssisə və obyektin yerləşdiyi dövlət torpaq sahəsi özəlləşdirilmişdir. Dövlət əmlakının satılmasına və mülkiyyət hüquqlarının əldə edilməsinə dair 1700 şəhadətnamə verilmişdir. Dövlət büdcəsinə 20 milyon manat vəsaitin ödənilməsi təmin olunmuşdur.

Möhtərəm Prezident!

Sizin, ölkənin qeyri-neft sektorunun inkişafı, bu sektora investisiya qoyuluşlarının artırılması, istehsal və sənaye müəssisələrinin fəaliyyətinin yenidən qurulması, rəqabətqabiliyyətli məhsulların istehsalına nail olunması ilə əlaqədar tapşırıqlarınızın icrası məqsədi ilə dövlət müəssisələrinin investisiya müsabiqələri vasitəsilə özəlləşdirilməsinin sürətləndirilməsi istiqamətində zəruri işlər görülməkdədir.

Ötən dövr ərzində 22 müəssisə investisiya müsabiqəsi vasitəsilə özəlləşdirilmişdir. Müsabiqənin qalibləri tərəfindən bu müəssisələrə təxminən 465 milyon ABŞ dolları həcmində investisiyanın qoyulması, dövlət büdcəsinə isə 10 milyon manat vəsatin ödənilməsi barədə öhdəliklər götürülmüşdür. Nəticə etibarilə həmin müəssisələrdə 4 min yeni iş yerinin açılması nəzərdə tutulmuşdur.

İnvestisiya müsabiqələri vasitəsilə özəlləşdirilmiş müəssisələrə bu dövr ərzində artıq 180 milyon ABŞ dolları həcmində investisiya qoyulmuş, onlarda 2,5 min yeni iş yeri açılmışdır. Özəlləşdirilən və idarəetməyə verilən müəssisələrdə investisiya qoyuluşlarına nəzarət tədbirləri nəticəsində 8 müəssisə üzrə öhdəliklərin icra olunmadığı aşkar edilmiş və müqavilələrə xitam verilmişdir.

2007-ci ilin birinci yarımilində 7 səhmdar cəmiyyətinin səhmlərinin investisiya müsabiqəsi vasitəsilə satışı keçirilmişdir. Bu müəssisələrə müsabiqənin qalibləri tərəfindən 8 milyon ABŞ dolları həcmində investisiyanın qoyulması barədə öhdəliklər götürülmüşdür. İnvestisiya müsabiqəsi vasitəsilə özəlləşdirilmiş müəssisələrə 2007-cı ilin birinci yarımilində müqavilələr üzrə müsabiqə qalibləri tərəfindən 31 milyon ABŞ dolları investisiya qoyulmuş, 900 yeni iş yeri açılmışdır.

“Azərbaycan Respublikasında maliyyə-bank sistemində islahatların dərinləşdirilməsi ilə əlaqədar əlavə tədbirlər haqqında” müvafiq Fərmanın icrasının təmin edilməsi məqsədi ilə “Kapital Bank” Açıq Səhmdar Cəmiyyətinin yeni emissiya olunmuş səhmlərinin dövlətsizləşdirilməsi ilə bağlı tədbirlər başa çatdırılmışdır. Hazırda seçilmiş məsləhətçi şirkətlə birlikdə bankın dövlətə məxsus 50 faiz səhmlərinin özəlləşdirilməsi ilə bağlı işlər aparılır.

Özəlləşdirmə prosesinin daha səmərəli və şəffaflıq prinsipi əsasında aparılması məqsədi ilə strateji müəssisələrə, o cümlədən rabitə, hava nəqliyyatı müəssisələrinin, birgə müəssisələrin qiymətləndirilməsinə və özəlləşdirilməsinə məsləhətçi şirkətlərin cəlb edilməsi sahəsində də qanunvericiliklə nəzərdə tutulmuş tədbirlər həyata keçirilir. Dövlət əmlakının idarə edilməsinin təkmilləşdirilməsi üzrə Dövlət proqramına uyğun olaraq, kommunal və infrastruktur sahələrinə aid müəssisələrin restrukturizasiyası məqsədi ilə müvafiq qurumlarla birlikdə təhlillərə başlanmışdır.

Dövlət müəssisələrinin özəlləşdirməqabağı sağlamlaşdırılması və özəlləşdirmədən sonra dəstəklənməsi ilə bağlı sahəvi təhlillər aparılır. Konkret müəssisələr üzrə 10-dək pilot layihə hazırlanmışdır. Hazırda həmin müəssisələrlə bağlı maliyyə, iqtisadi, texniki və marketinq araşdırmaları aparılır. Sağlamlaşdırma tədbirləri ilə müəssisələrdə səmərəli idarəetmə strukturunun formalaşdırılması və müasir menecmentin tətbiqi, köhnə istehsal sahələrinin yeniləri ilə əvəzlənməsi, müəssisələrin borclarının restrukturizasiyası, müasir idarəçilik təfəkkürünə malik kadrların hazırlanması təmin oluna bilər. Bu isə özəlləşdirilən müəssisələrin fəaliyyətinin müasir tələblərə uyğun yenidən qurulmasına, iş yerlərinin açılmasına və onların səmərəli fəaliyyət göstərməsinə şərait yaradacaqdır.

Sizin tapşırığınıza əsasən və bilavasitə dəstəyiniz və rəhbərliyinizlə ölkəmizin qeyri-neft sektoruna aid müəssisələrin fəaliyyətinin bərpası və inkişafının sürətləndirilməsi, investisiyaların cəlb edilməsi, yeni iş yerlərinin açılması məqsədi ilə dövlət əmlakının idarə edilməsi və özəlləşdirilməsi prosesinin daha səmərəli və şəffaf şəkildə həyata keçirilməsi sahəsində fəaliyyətimizi davam etdirəcəyik.

                                                                 X X X

Azərbaycan Prezidenti İlham Əliyev iclasa yekun vurdu.