Dövlət Neft Şirkətinin Ekologiya İdarəsində tələbələrin ödənişli yay istehsalat təcrübəsi başlamışdır
Bakı, 4 iyul (AZƏRTAC). Azərbaycan Respublikası Dövlət Neft Şirkətinin (ARDNŞ) Ekologiya İdarəsində tələbələrin ödənişli yay istehsalat təcrübəsi başlamışdır.
AZƏRTAC xəbər verir ki, istehsalat təcrübəsində ARDNŞ-in “Yay təcrübəsi proqramı” layihəsi çərçivəsində respublikanın müxtəlif təhsil müəssisələrində ekologiya və ətraf mühitin mühafizəsi ixtisasları üzrə təhsil alan 12 tələbə iştirak edir.
Tələbələrin idarənin struktur bölmə rəhbərləri ilə görüşü keçirilmiş və hər bir tələbəyə fərdi qaydada təcrübə rəhbəri təyin olunmuşdur. İxtisaslarına və seçimlərinə uyğun olaraq 8 tələbə ekoloji monitorinq departamentinin ekoloji tədqiqatlar ekspedisiyasında, 4 gənc isə ekoloji ölçmə və tullantıların idarə olunması departamentinin ekoloji ölçmə mərkəzində müvafiq işlə təmin edilmiş, onlara təcrübə keçmək üçün hər cür şərait yaradılmışdır.
Proqramın şərtlərinə uyğun olaraq, tələbələrlə müvəqqəti əmək müqaviləsi bağlanmış, onlara əməyin mühafizəsi və təhlükəsizlik texnikası üzrə təlim keçirilmişdir.
Yay istehsalat təcrübəsi tələbələrin istəyindən asılı olaraq bir və ya iki ay davam edəcəkdir.
Bölmənin digər xəbərləri
