DÖVLƏT QULLUĞU ORQANLARININ KADR HEYƏTİNİN FORMALAŞMASINDA MÜSABİQƏ VƏ ŞƏFFAFLIQ GÜNÜN TƏLƏBİDİR
- Cənab general, müsabiqə hansı prinsip və şərtlər əsasında keçirilir və məqsədi nədir?
- Son illər Azərbaycanda dövlət qulluğu sahəsində aparılan islahatlar, o cümlədən dövlət qulluğuna qəbulun müsabiqə və şəffaflıq əsasında həyata keçirilməsi ölkəmizdə demokratiya, insan hüquq və azadlıqlarının aliliyi, peşə və fəaliyyət seçimində insanların bərabərhüquqluluğu və sərbəstliyi prinsiplərinin bərqərar olunmasına istiqamətlənmiş mühüm amillərdən birinə çevrilmişdir.
Sözsüz ki, dövlət idarəetmə sisteminin əsas tərkib hissələrindən biri olan daxili işlər orqanları da bu proseslərdən kənarda qalmamış və kadr heyətinin formalaşdırılmasında müasir prinsip və texnologiyaların tətbiqi istiqamətində ardıcıl surətdə iş aparılmaqdadır.
Azərbaycan Respublikasının 2001-ci il 29 iyun tarixli Qanunu ilə təsdiq edilmiş “Azərbaycan Respublikasının daxili işlər orqanlarında xidmət keçmə haqqında Əsasnamə”yə görə, daxili işlər orqanlarında xidmət keçmə bu orqanların funksiya, vəzifə və hüquqlarını öz peşə fəaliyyətləri ilə həyata keçirən Azərbaycan Respublikası vətəndaşlarının dövlət qulluğunun xüsusi növüdür.
Qanunvericilikdə daxili işlər orqanlarında xidmətin özəllikləri təsdiqlənsə də, elə həmin Əsasnamədə xidmətə qəbulun müsabiqə və şəffaflıq əsasında aparılması başlıca prinsip kimi təsbit olunmuşdur.
Daxili işlər orqanlarının orta və böyük rəis heyəti (yaxud zabit heyəti) vəzifələrində xidmətə qəbul üzrə müsabiqənin keçirilməsi qaydaları məhz bu prinsiplər üzərində qurulmuşdur.
Müsabiqənin əsas məqsədi xidmətə qəbul olunmaq istəyən şəxslərin peşə hazırlığının, bilik səviyyəsinin, ümumi dünyagörüşünün, daxili işlər orqanlarında xidmətə yararlığı və layiqliyinin müəyyən edilməsidir. Qaydalara görə, müsabiqə test imtahanından və müsahibədən ibarətdir. Test imtahanı Azərbaycan Respublikasının Tələbə Qəbulu üzrə Dövlət Komissiyası (TQDK) tərəfindən, müsahibə isə DİN-də yaradılan Müsabiqə Komissiyası tərəfindən aparılır.
Daxili işlər orqanlarında zabit vəzifələri üzrə vakant yerlər yarandıqda, DİN tərəfindən xidmətə qəbul üzrə müsabiqə elan edilir. Müsabiqədə iştirak etmək istəyənlərin ərizələri 1 ay ərzində qəbul olunur, müəyyən olunmuş qaydada sənədləşdirmə aparılır və barələrində zəruri yoxlamalar keçirilir.
Sənədləşmə və xüsusi yoxlamaların nəticələri üzrə xidmətə qəbula yararlı hesab edilmiş şəxslər müsabiqənin test imtahanı mərhələsinə buraxılırlar.
-Cənab general, test imtahanı suallarında əsas üstünlük nəyə verilir və bəzi istisnalar nəzərə alınırmı?
-Test imtahanlarının sual kartları 100 sualdan ibarətdir. Onlardan 80-i ali hüquq təhsili proqramına və daxili işlər orqanlarının fəaliyyətinə aid qanunvericiliyə, 20-si isə namizədin ümumi intellektual səviyyəsini və dünyagörüşünü qiymətləndirməyə imkan verən sahələrə aiddir. İmtahanda hər düzgün cavab 1 balla qiymətləndirilir və keçid balı 65 bala bərabərdir. Test imtahanlarını müvəffəqiyyətlə keçmiş şəxslər müsabiqənin müsahibə mərhələsinə buraxılırlar.
Hər bir namizədlə müsahibə fərdi qaydada, onun əvvəlki əmək fəaliyyəti, təhsili, gələcək işi, ölkənin qanunvericiliyi, ictimai-siyasi həyatı və sair bu kimi məsələlər ətrafında aparılır. Müsahibənin nəticələri 5 ballıq sistem üzrə qiymətləndirilməklə minimum keçid balı 3 bal müəyyən edilmişdir. Müsabiqənin hər 2 mərhələsində minimum keçid ballarını toplamış namizədlər müsabiqədən keçmiş hesab edilir.
Hüquq sahəsi üzrə elmi dərəcəyə malik, habelə qeyri-hüquq ixtisası üzrə mütəxəssis tələb olunan zabit vəzifələrində xidmətə qəbul üçün elan olunmuş müsabiqədə iştirak edən şəxslər test imtahanlarından azad olunur və onlarla yalnız Müsabiqə Komissiyasında müsahibə aparılır.
Müsabiqə tam başa çatdıqdan sonra müsabiqəni uğurla keçmiş namizədlərin daxili işlər orqanlarında xidmətə və müsabiqəyə elan olunmuş zabit vəzifələrinə təyin olunması məsələsi həll edilir.
-Ümumiyyətlə, müsabiqənin şəffaflığının təmin olunması və namizədlərin sayı barədə nə deyərdiniz?
-Hazırlanmış qaydalar daxili işlər orqanlarında xidmətə qəbulun müsabiqə və şəffaflıq əsasında keçirilməsi prinsiplərinin praktiki tətbiqinin bütün sahələrini əhatə edir və müsabiqənin elan olunmasından başlayaraq, müsabiqənin qaliblərinin vəzifəyə təyin edilməsinə kimi bütün məsələləri tam tənzimləyir. Məhz bu qaydalar əsasında ötən ilin noyabrında xidmətə qəbulla əlaqədar ilk müsabiqə elan edilmiş və namizədlərin sənədləri toplanılaraq barələrində xüsusi yoxlamalar keçirilmişdir.
Bununla yanaşı, qaydalara uyğun olaraq, test imtahanlarının proqramı və suallar bazası DİN-in internet saytında yerləşdirilmiş, eləcə də ayrıca kitabça şəkilində çap edilərək namizədlərə paylanmışdır. Eyni zamanda, qəbula namizədlərin siyahısı TQDK-ya təqdim olunmuş və ilk müsabiqənin test imtahanı fevralın 11-nə təyin edilmişdir.
Etiraf etməliyəm ki, müsabiqədə iştirak etmək üçün müraciət edənlərin sayı gözlədiyimizdən xeyli aşağı olmuş və son nəticədə cəmi 81 namizəd qalmışdır. Lakin buna baxmayaraq, ümid edirik ki, namizədlər bu imtahanlarda yüksək nəticələr göstərəcək, bütövlükdə müsabiqəni uğurla başa vuraraq, gələcəkdə daxili işlər orqanlarının şəxsi heyətinin sıralarında dövlətimizə və xalqımıza şərəflə xidmət edəcəklər.
Bölmənin digər xəbərləri
