Dunay Bədirxanov: İKT ölkə iqtisadiyyatında neftdən sonra ikinci əsas sahəyə çevrilib
Bakı, 10 fevral, AZƏRTAC
“Azərkosmos” Avropa, Afrika, Yaxın Şərq, Mərkəzi və Cənubi Asiyanın 42 ölkəsində 182 yerli və beynəlxalq müştəriyə, həmçinin 200 televiziya və radioya 5 dildə xidmət göstərir.
AZƏRTAC xəbər verir ki, bunu “Azərkosmos”un sədr müavini Dunay Bədirxanov deyib.
Onun sözlərinə görə, “Azərkosmos” Qafqaz regionunda ilk peyk operatoru kimi fəaliyyətə başladığı bu yolda bir məqsədə xidmət edən vahid komandanı ərsəyə gətirib. Hazırda qurumda 200-dən çox mütəxəssis çalışır. Ölkəmizdə kosmos sahəsi üzrə hüquqşünas, iqtisadçı, peyk mühəndisi, peyk əməliyyatları üzrə operator, peyk təsvirləri üzrə mütəxəssis, peyk tutumlarının satılması üzrə peşələr ərsəyə gəlib.
Sədr müavini qeyd edib ki, “Azərkosmos” 10 illik fəaliyyəti dövründə “Azerspace-1”, “Azerspace-2” və “Azersky" peyklərinin xidmətlərindən 500 milyon manat gəlir əldə edib. 2013-cü ildə İKT ölkə iqtisadiyyatında neftdən sonra ikinci əsas sahə elan olunub. Vurğulayıb ki, “Azerspace-1” peyki ilə başlayan kommersiya fəaliyyəti ölkənin uzunmüddətli inkişaf strategiyasında yer tutan əhəmiyyətli bir sahəyə çevrilib.
Bu gəlirlərin 90 faizinin agentliyin ixrac edilən xidmətlərindən əldə edildiyini söyləyən D.Bədirxanov bildirib ki, növbəti illərdə peyklərimizin resursları hesabına gəlirlərdə artım dinamikasının qorunub saxlanılması hədəflənib.
Dunay Bədirxanov, həmçinin əlavə edib ki, Azərbaycanın "Azersky" peyki gün ərzində 6 milyon kvadrat-kilometr ərazinin təsvirini verə bilir: “Dövlət qurumlarını peyk təsvirlərini analiz etməsi üçün "web CİS" sistemi yaradılıb. Belə ki, onlayn coğrafi informasiya sistemləri vasitəsilə peyk görüntüləri üzərindən dinc məqsədlər üçün analizlər apara bilər. Təqdim edilən təsvirlər ictimaiyyət üçün açıq deyil, amma məqsəd operativ qaydada fəaliyyətdir”.
Sədr müavini ölkəmizdə keçirilməsi nəzərdə tutulan Beynəlxalq Astronavtika Konqresi (BAK) barədə də məlumat verib. Qeyd edib ki, BAK 1950-ci ildən başlayaraq hər il Beynəlxalq Astronavtika Akademiyasının və Beynəlxalq Kosmik Hüquq İnstitutunun dəstəyi ilə Beynəlxalq Astronavtika Federasiyası (BAF) tərəfindən təşkil olunur.
Hər il keçirilən BAK yüksək səviyyəli rəsmilər, beynəlxalq kosmik agentlik və institutlar, alim, mühəndis və akademiklər, gənc mütəxəssis və tələbələr, kosmik sahədə fəaliyyət göstərən sahibkarlar və startaplar daxil olmaqla, beynəlxalq kosmik cəmiyyət, eləcə də beynəlxalq media nümayəndələrini bir araya gətirir. Tədbir ən son yeniliklər barədə məlumat və bilik mübadiləsi aparılması məqsədi daşıyır, bütün iştirakçılar üçün netvörkinq imkanları təmin edir, mövcud tərəfdaşlıqların gücləndirilməsi və yeni əməkdaşlıqların qurulması üçün mühüm platforma rolu oynayır.
O əlavə edib ki, Azərbaycanda BAK tədbirinin tarixi 1973-cü ilə gedib çıxır. Belə ki, Ümummilli Lider Heydər Əliyevin təşəbbüsü ilə həmin il oktyabr 7-13-də “Kosmik tədqiqatlar - elm və texnikaya nüfuz” şüarı altında 24-cü BAK Azərbaycanda keçirilib, bununla da Bakı regionumuzda bu tədbirin təşkil olunduğu ilk şəhər olub.
Bölmənin digər xəbərləri
