Dünya Bankı Ebola virusunun yayıldığı ölkələrə 450 milyon dollar ayırıb
Dünya Bankı tərəfindən Ebola virusunun əhatə etdiyi ölkələrdə - Qvineya, Liberiya və Sierra Leonedə biznesi dəstəkləmək üçün 450 milyon dollar ayrılıb. Eyni zamanda, Birləşmiş Millətlər Təşkilatının İnkişaf Proqramı bu ölkələrin xarici yardımdan asılı olduğunu da bildirib.
AZƏRTAC BMT-nin İnformasiya mərkəzinə istinadən xəbər verir ki, maliyyə paketi bu üç ölkədə məşğulluq vəziyyəti və investisiya vəsaitlərinin genişləndirilməsi, ticarəti artırmaq və təkmilləşdirmək üçün nəzərdə tutulub.
Vəsaitin əsas hissəsi xaricdən zəruri ərzaqların alınmasına sərf olunacaq. Bir hissəsi isə Ebola səbəbindən iqtisadi böhran keçirən 800 kiçik və orta sahibkara yönələcək. Digər hissəsi isə epidemiya üzərində qələbədən sonra bu ölkələrin bərpası ilə bağlı investisiya layihələrinə yatırılacaq.
Xatırladaq ki, oktyabr ayının sonlarında Dünya Bankı həmin ölkələrdə Ebolaya qarşı mübarizəyə həkimləri cəlb etmək üçün 100 milyon dollar ayırmışdı.
Bölmənin digər xəbərləri
