Əcnəbi idmançılar Azərbaycanda keçirilən beynəlxalq yarışlara böyük məmnuniyyətlə qatılırlar
Bakı, 19 iyun, AZƏRTAC
2023-cü il Paris Yay Olimpiya Oyunlarına əsas hazırlıq ili olduğundan dünyanın qabaqcıl idman ölkələri komandalarının hazırlığına xüsusi diqqət yetirir, onların yarışlarda iştirakını təmin etmək üçün bütün imkanlardan istifadə etməyə çalışırlar. Təsadüfi deyil ki, dünyanın nüfuzlu idman qurumları dördilliyin ən önəmli yarışına vəsiqə verən mötəbər idman turnirlərinin keçirilməsini Azərbaycana böyük məmnuniyyətlə etibar edirlər. Çünki həmin yarışlar böyük uğurla və hər kəsin təhlükəsizliyinin ən yüksək səviyyədə təmin olunması ilə baş tutur.
Bu sözləri AZƏRTAC-a müsahibəsində idman eksperti, Azərbaycan Alpaqut Federasiyasının prezidenti Qüdrət Nuriyev deyib. O qeyd edib ki, bu ilin avqustunda Bakıda keçiriləcək atıcılıq üzrə dünya çempionatını idmansevərlərlə yanaşı, planetin ən güclü atıcıları da böyük ümid və həyəcanla gözləyirlər. Çünki bu yarışda Olimpiadaya ən çox lisenziya öz sahibini tapacaq. Mötəbər turnir “Paris-2024” Yay Olimpiya Oyunlarına 48 lisenziya verəcək. Artıq bir çox ölkə yarışda iştirak üçün müraciət də ünvanlayıb. İndidən bəllidir ki, bu yarışa maksimum sayda ölkə qatılacaq. Hətta iki ay əvvəl İrəvanda keçirilən ağırlıqqaldırma üzrə Avropa çempionatının açılış mərasimində Azərbaycan Bayrağını yandıran Ermənistan da Bakıda keçiriləcək yarışlarda iştirak üçün müraciət edib.
İdman eksperti rasizmin, milli, dini ayrı-seçkiliyin güclü olduğu düşmən ölkədə bayrağımızın yandırılmasının ona baha başa gəldiyini qeyd edərək deyib: “2024-cü ildə keçiriləcək dünya çempionatının təşkili hüququnun Ermənistana verilməməsi beynəlxalq tədbirləri qəbul etməyə və keçirməyə layiq olmadığını açıq göstərdi. Halbuki bu artıq həll olunmuş, razılıqlar alınmış, yalnız rəsmiləşməsi qalan bir məsələ idi.
Ermənistan dünya arenasında ən miskin, sözü ilə əməli bir olmayan, ən kiçik yarışlarda belə iştirakçıların təhlükəsizliyini təmin edə bilməyən ölkə kimi gündəmə gəlsə də, min bir dona girməklə əsl simalarını gizlətməyə çalışmışdılar. Riyakar olduğu qədər də hiyləgər olan düşmən dünyanın bir nömrəli idman yarışına - Olimpiadaya gedən yolun Bakıdan keçdiyini çox yaxşı anlayır. Bir çox idman növləri üzrə birbaşa olimpiya lisenziyası verən yarışlarla bağlı, Olimpiadaya reytinq xalları qazandıran turnirlər də keçirilir. Digər tərəfdən indiyədək Azərbaycanda iştirak etdikləri bütün yarışlarda onlar üçün xarici komandalarla eyni şəraitin yaradılması, öz bacarıqlarından istifadə etmək üçün heç bir maneənin olmaması onları yenidən Bakıda mübarizə aparmağa sövq edir.
Özü də ev sahibliyimizlə keçirilən demək olar ki, bütün beynəlxalq yarışlara dünya ölkələri böyük məmnuniyyət və tam fəallıqla qatılırlar. İyunun əvvəllərində Bakının ev sahibliyi ilə keçirilən taekvondo üzrə dünya çempionatında 144 ölkədən 921 idmançı qüvvəsini sınadı. Dünya Taekvondo Federasiyasının 50 illiyinə təsadüf edən bu mötəbər turnir rekord sayda izləyici auditoriyası toplaması ilə diqqət çəkdi.
Bəli, Azərbaycan bu gün dünya səviyyəsində ən maraq göstərilən, inkişafı təqdir edilən, hər bir sahədə günün tələblərinə cavab verən müasir standartları ilə diqqət mərkəzindədir. Ölkəmizdə təşkil edilən hər bir tədbirin, böyük yarışların maraqla izlənməsi dediklərimizin bariz nümunəsidir”.
Qüdrət Nuriyev onu da vurğulayıb ki, beynəlxalq yarışları hər zaman siyasiləşdirən Ermənistan ən mötəbər tədbirlərin Bakıda keçirilməsinə qısqanclıqla yanaşır, hər vəchlə belə tədbirlərin keçirilməsinə mane olmaq istəyir. Elə bu il Azərbaycanda Formula 1 yarışının keçirilməsinə etiraz edən İrəvan beynəlxalq ictimaiyyətə çağırış edib ki, bu nüfuzlu yarış ölkəmizdə keçirilməsin. Formula 1 yarışının keçirilməsində yeni keyfiyyət - “Bakı” brendini yaradan ölkəmizə, təbii ki, Ermənistan kimi cılız və miskin dövlətlər mane ola bilməzlər. Bütün dünya da Azərbaycanın məqsəd və məramını, təşkilatçılığının səviyyəsini yaxşı bilir və növbəti Formula 1-in keçirilməsi üçün Bakıdan başqa bir məkan yoxdur.
Dünyada tolerantlığın, müxtəlif dini və etnik qrupların nümayəndələrinin dinc birgəyaşayışının nümunəsi sayılan Azərbaycanın son bir neçə ay ərzində ev sahibliyi etdiyi dünya, Avropa çempionatları, dünya kuboku turnirlərinin iştirakçıları ölkəmizdə formalaşmış ənənələrin şahidi oldular, mətbuata açıqlamalarında milli dəyərlərimizin dünyaya qiymətli töhfələr verdiyini dönə-dönə vurğulayıblar.
Ekspert bu gün idmanı inkişaf etdirmək, eləcə də ən güclü yarışların təşkili üçün Azərbaycanda bütün şəraitin olduğunu bildirib. Deyib ki, təkcə paytaxt Bakıda deyil, bölgələrdə də idman infrastrukturu inkişaf etdirilir. Sevindirici haldır ki, işğaldan azad edilmiş torpaqlarımızda - o cümlədən doğma Şuşamızda da beynəlxalq turnirlər yüksək səviyyədə keçirilir. Ölkəmizin şöhrəti dünyaya yayıldıqca hər birimiz fəxarət hissi keçirir, Azərbaycanla qürur duyuruq. İdmançılarımız da onlara göstərilən diqqət və qayğıya cavab olaraq böyük uğurlarla xalqımızı sevindirilər.
“Bir gündən sonra Polşanın Krakov şəhərində III Avropa Oyunları keçiriləcək. Bu möhtəşəm yarışın Vətəni Azərbaycandır. Həmişə əzmkarlığı ilə seçilən komandamızın tarixi oyunlarda da böyük nailiyyətlər əldə edəcəyinə inanırıq”, - deyə Qüdrət Nuriyev əlavə edib.
Bölmənin digər xəbərləri
