Eden Hazard Avropanın beş böyük milli çempionatında ən çox məhsuldar ötürmə edən futbolçudur
Bakı, 6 may, AZƏRTAC
Londonun “Çelsi” futbol klubunun yarımmüdafiəçisi Eden Hazard Avropanın beş böyük milli çempionatında ən çox məhsuldar ötürmə edən futbolçudur.
AZƏRTAC xəbər verir ki, 28 yaşlı belçikalı yarımmüdafiəçi İngiltərə çempionatının 37-ci turunda “Uatford” (3:0) komandası ilə görüşdə iki məhsuldar ötürmə verib. Bununla da E.Hazard cari mövsümdə məhsuldar ötürmələrinin sayını 15-ə çatdıraraq Avropanın əsas liqalarında çıxış edən futbolçular arasında birinci olub.
Bu göstərici üzrə ikinci yerdə 14 məhsuldar ötürmə ilə İngiltərənin “Bornmut” klubunun hücumçusu Ryan Freyzer və “Borussiya Dortmund”un yarımmüdafiəçisi Jadon Sanço qərarlaşıblar. “Barselona”nın argentinalı hücumçusu Lionel Messi isə 13 ötürmə ilə üçüncüdür.
Belçikalı futbolçu cari mövsümdə “Çelsi”nin heyətində keçirdiyi 49 oyunda 19 qol vurub.
Bölmənin digər xəbərləri
