ƏKİNLƏR SUVARMA SUYU İLƏ TƏMİN EDİLİR

17.01.2006 [03:13]
Çap et
A⁺ A^-

AZƏRTAC-ın müxbiri xəbər verir ki, 2005-ci ildə Tovuz rayonunda kənd təsərrüfatı məhsullarının əkin sahələri əvvəlki illərlə müqayisədə xeyli çox olmuşdur. Bu sahələrin suvarma suyu ilə normal təmin edilməsində Tovuz suvarma sistemləri idarəsi kollektivinin böyük əməyi vardır.

Ötən il ərzində əkinləri suvarma suyu ilə normal təmin edən kollektiv mövcud 32 nasos aqreqatının 30-nu təmir edərək saz vəziyyətə gətirmişdir. Əlibəyli və Aşağı Öysüzlü kəndindəki 250 kilovoltluq, Qızıl Ulğum adlanan ərazidəki 2 ədəd 250 kilovoltluq, Ağstafaçay sağ sahil kanalına su ötürən üçpilləli nasos stansiyasında 2 ədəd 800 kilovoltluq elektrik mühərrikləri təmir olunaraq istismara verilmişdir.

Bundan əlavə, tikintisi yarımçıq qalmış Tovuzçay su anbarından rayonun Ağdaş adlanan ərazisini suvarma suyu ilə təmin etmək məqsədilə tikiləcək nasos stansiyasının və Ağstafaçay sağ sahil kanalından Mülkülü kəndinin ərazisinə su vermək üçün çəkiləcək boru kəmərinin layihə-smeta sənədləri hazırlanmaqdadır.

İdarənin kollektivi 2006-cı ildə təsərrüfatları suvarma suyu ilə təmin etmək üçün əzmlə çalışır.