“Ekol Mühəndislik Xidmətləri” QSC-də ətraf mühitin mühafizəsi sahəsində zəruri tədbirlər davam etdirilir
Bakı, 22 oktyabr, AZƏRTACRespublikamızda ekoloji vəziyyətin yaxşılaşdırılmasına dair dövlət proqramı çərçivəsində Azərbaycan Respublikası Dövlət Neft Şirkətinin (ARDNŞ) “Ekol Mühəndislik Xidmətləri” QSC neft emalı zavodlarında texnoloji proseslər nəticəsində formalaşan sənaye-çirkab axıntı sularının təmizlənməsi, neftşlamın emalı və zərərsizləşdirilməsi layihələrinin icrasını uğurla davam etdirir.
QSC-dən AZƏRTAC-a bildiriblər ki, müəssisənin tullantıların emalı departamenti Heydər Əliyev adına Bakı neft emalı və “Azərneftyağ” neft emalı zavodlarının istehsalat sahələrində təmizləyici qurğulara daxil olan tullantıların təmizlənməsini və zərərsizləşdirilməsini texnoloji reqlamentə uyğun olaraq yerinə yetirir. Eyni zamanda, QSC-nin xidmət sahələrindəki mövcud mexaniki təmizləyici qurğuların məhsuldarlığını artırmaqla yanaşı, yeni texnika və texnologiyaların istehsalata tətbiqi istiqamətində də zəruri tədbirlər görülür. Hazırda xidmət sahələrində istismar olunan İsveçrənin “Alfa-Laval” şirkətinin modul dekantor, “FOX-15” və İtaliyanın “Pieralisi” şirkətinin modul trikantor qurğuları müsbət nəticələr verməkdədir.
Xidmət sahələrində istismarda olan qurğuların saz vəziyyətdə işləməsi, texnoloji proseslərin keyfiyyətinin yaxşılaşdırılması və ətraf mühitə mənfi təsirlərin qarşısının alınması məqsədilə, departamentin kollektivi tərəfindən mütəmadi olaraq profilaktiki təmir işləri aparılır və texniki xidmətlər göstərilir.
Bölmənin digər xəbərləri
