“Ekol Mühəndislik Xidmətləri” QSC-nin xidmət göstərdiyi yaşıllıq sahələrində mövsümü işlər həyata keçirilir
Bakı, 30 iyun (AZƏRTAC). “Ekol Mühəndislik Xidmətləri” Qapalı Səhmdar Cəmiyyəti (QSC) Azərbaycan Respublikası Dövlət Neft Şirkətinin (ARDNŞ) fəaliyyət sahələrində neftlə çirklənmiş və reabilitasiya olunmuş torpaqların landşaftının bərpası və həmin ərazilərin ekoloji vəziyyətinin yaxşılaşdırılması, yaşıllıqlara aqrotexniki xidmətlərin göstərilməsi sahəsində fəaliyyətini davam etdirir.
AZƏRTAC xəbər verir ki, QSC-nin torpaqların rekultivasiyası departamenti tərəfindən “Azneft” İstehsalat Birliyinin “Abşeronneft”, “Bibiheybətneft” və H.Z.Tağıyev adına neftqazçıxarma idarələrinin reabilitasiya olunmuş mədən ərazilərindəki yaşıllıq sahələrində 66 mindən çox, ARDNŞ-in qaz emalı zavodunun ərazisindəki yaşıllıq sahəsində isə 9 minə qədər müxtəlif ağac və bəzək kollarına yüksək səviyyəli aqrotexniki xidmətlər göstərilir.
Torpaqların rekultivasiya departamenti əməkçiləri yay mövsümü ilə əlaqədar mövcud yaşıllıq sahələrinin alaq otlarından təmizlənməsi, bitkilərin diblərinin boşaldılması, gübrələrin verilməsi və su təchizatının yay mövsümü normalarına uyğun təmin edilməsi istiqamətində məqsədyönlü işlər həyata keçirirlər. Yaşıllıq sahələrinin mexaniki suvarma sistemləri ilə (damcı üsulu ilə) təchiz olunması da bitkilərin isti yay günlərində su təminatının optimallaşdırılması, mühafizəsi və inkişafı üçün əlverişli şərait yaratmışdır.
Hazırda departament xidmət göstərdiyi yaşıllıq sahələrinin yay mövsümündə normal inkişafı, bitkilərin istidən və xəstəliklərdən mühafizəsi üçün ardıcıl və zəruri tədbirlərini davam etdirir.
Bölmənin digər xəbərləri
