“Ekol Mühəndislik Xidmətləri” QSC xarici əlaqələrini artırır
Bakı, 1 fevral (AZƏRTAC). “Ekol Mühəndislik Xidmətləri” QSC-in baş ofisində Almaniyanın GİCON şirkətinin nümayəndələri ilə tanışlıq xarakterli görüş keçirilmişdir. Görüşdə GİCON şirkətinin layihə rəhbəri Mathias du Puits, layihə eksperti Hartmurt Yunge, şirkətin Azərbaycan üzrə nümayəndəsi, büro rəhbəri Səkinə Məhərrəmova iştirak etmişlər.
QSC-dən AZƏRTAC-a verilən məlumata görə, görüşdə baş direktor Ramil Əliyev qurum haqqında qonaqlara qısa məlumat vermişdir.
GİCON-un layihə rəhbəri Mathias du Puits bildirmişdir ki, şirkət 20 ildən artıqdır ki, fəaliyyət göstərir və Almaniyanın ən böyük məsləhətçi təşkilatlarından biridir. Şirkətin nəzdində 2 böyük, ən müasir laboratoriya fəaliyyət göstərir. Şirkətdə 250-dən çox peşəkar mütəxəssis çalışır və illik gəlir 20 milyon ABŞ dolları təşkil edir. İSO 9000, İSO 14000 və İSO 1700 standartları ilə fəaliyyət göstərən şirkət əsasən xüsusi tullantıların zərərsizləşdirilməsi, çirklənmiş torpaqların təmizlənməsi üçün rəylərin hazırlanması, torpağın, qruntun, suların və havanın çirklənmə səviyyəsinin müəyyənləşdirilməsi, eləcə də layihələrin planlaşdırılması və nəticələrin yoxlanması kimi fəaliyyət sahələri ilə məşğuldur.
GİCON şirkəti təkcə Almaniyada deyil, eləcə də ABŞ, Rusiya, İngiltərə və s. ölkələrdə tanınmış məsləhətçi təşkilat olaraq bir çox layihələr həyata keçirmişdir. Şirkət hazırda Azərbaycanda kimya sənayesi sahələrində xüsusi tullantıların idarə olunması sahəsində böyük bir layihənin planlaşdırılması ilə məşğuldur. M.du Pults bildirmişdir ki, görüşün əsas məqsəd oxşar fəaliyyət sahələri ilə tanınmış “Ekol Mühəndislik Xidmətləri” QSC ilə əməkdaşlıq əlaqələrinin mümkün variantlarını müzakirə etməkdir.
QSC-in baş direktoru Ramil Əliyev GİCON şirkəti ilə əməkdaşlıq etməkdə maraqlı olduqlarını diqqətə çatdırmışdır. Bunun üçün qarşılıqlı görüşlərin artırılmasına və ikitərəfli konkret təkliflərin hazırlanıb təqdim edilməsinə səyləri artırmalıyıq.
Bölmənin digər xəbərləri
