“EKOLOGİYA İLİ” ÇƏRÇİVƏSİNDƏ LƏNKƏRAN RAYONUNDAKI HİRKAN MİLLİ PARKINA PRESS-TUR TƏŞKİL EDİLMİŞDİR
Lənkəran, 19 iyun (AZƏRTAC). Ekologiya və Təbii Sərvətlər Nazirliyi “Ekologiya ili” çərçivəsində Lənkəran rayonundakı Hirkan Milli Parkına press-tur təşkil etmişdir.
“Yaşıl dünya naminə” devizi altında keçirilən tədbirin məqsədi jurnalistləri milli parkın flora və faunası ilə yaxından tanış etmək olmuşdur.
Hirkan Milli Parkının elmi işlər üzrə direktor müavini Hacıağa Səfərov jurnalistlərə məlumat vermişdir ki, parkın ümumi ərazisi 40 min 358 hektardır. Park qoruq hissəsi, yasaqlıq və turizm üçün istifadə olunan ərazilər də daxil olmaqla, üç hissəyə bölünür. Burada şabalıdyarpaq palıd, dəmirağac, Lənkəran akasiyası, Xəzər lələyi, Hirkan ənciri, Qafqaz xurması, Azat və digər endemik ağaclar mühafizə olunur. Parkın faunasına daxil olan qara leylək, məzar qartalı, qıvrımlələk qutan, turac, mərmər cürə, Talış qırqovulu, Hirkan arıquşu, toğlugötürən kimi quşlar parka xüsusi gözəllik verir. Parkda məməli heyvanlardan bəbir, xallı maral, vaşaq, porsuq, qaban, cüyür, yenot da vardır.
Jurnalistlər parkın flora və faunası ilə yaxından tanış olmuş, nazirliyin mütəxəssisləri onları maraqlandıran sualları cavablandırmışlar.
Bölmənin digər xəbərləri
