Ekologiya üzrə Texniki Komitənin dördüncü iclası keçirilmişdir
Bakı, 2 fevral (AZƏRTAC). 2011-ci ilin yekunlarına dair Ekologiya üzrə Texniki Komitənin dördüncü iclası keçirilmişdir.
Ekologiya və Təbii Sərvətlər Nazirliyindən AZƏRTAC-a verilən məlumata görə, iclasda ötən ildə komitənin alt komitələri tərəfindən iş planlarına uyğun olaraq atmosferdə kükürd dioksidin kütlə qatılığının spektrofotometrik metodla təyini, istehsalatda elektromaqnit sahəsinə olan tələblər, yaşayış evlərində, ictimai binalarda və tikinti aparılan ərazilərdə 50 hs tezlikli maqnit sahələrinə olan gigiyena tələbləri, təbii sularda qoxunun, şəffaflığın və xüsusi elektrik keçiriciliyinin təyini və digər qaydaların layihələri, o cümlədən suyun keyfiyyəti üzrə tərtib edilmiş 8 hissəli lüğətlə bağlı müzakirələr aparılmışdır.
Rəy və təkliflər dinlənildikdən sonra, həmin standart və qayda layihələrinin təsdiq edilməsi üçün Standartlaşdırma, Metrologiya və Patent Komitəsinə təqdim edilməsi qərara alınmış və alt komitələrin 2012-ci ilə dair iş planları təsdiq edilmişdir.
Bundan başqa, Ekologiya üzrə Texniki Komitə tərəfindən təbii və süni göllərdən su, dib çöküntülərindən, lildən, su axınlarından, dəniz sularından və çirkab sulardan nümunələrin götürülməsi üzrə qaydalar hazırlanaraq aidiyyəti üzrə təqdim olunmuş və Standartlaşdırma, Metrologiya və Patent üzrə Dövlət Komitəsi tərəfindən 2011-ci ildə təsdiq edilmişdir.
Bölmənin digər xəbərləri
