Ekspert: Azərbaycan pandemiya ilə mübarizədə ilk gündən qlobal təşəbbüslərlə çıxış edir
Bakı, 1 aprel, AZƏRTAC
Azərbaycan Rusiyadan sonra MDB ölkələri arasında ən tez vaksinasiyaya başlayan ölkə olmuşdur. Eyni zamanda, Rusiyadan sonra hər 100 nəfər insana vurulan dozanın həcminə görə ilk ölkədir. Nəzərə alsaq ki, Rusiya öz peyvəndini hazırlayan ölkədir, MDB ölkələri arasında koronavirusa qarşı peyvəndin satın alınmasına ilk təşəbbüs göstərmiş ölkə Azərbaycandır. Bunu AZƏRTAC-a Sağlamlığa Xidmət İctimai Birliyinin icraçı direktoru, ictimai səhiyyə üzrə ekspert Pərvanə Vəliyeva deyib.
MDB-yə daxil olan digər ölkələr Moldova, Belarus və Qazaxıstan isə vaksinasiyanı bir qədər gec başladıqları üçün hər 100 nəfər əhaliyə vurulan dozanın sayına görə geridə qalıblar. Azərbaycan vaksinasiya prosesinə yanvar ayının 18-də başladığı halda, Qazaxıstan 1 fevral tarixində, Qırğızıstan martın 1-də, Tacikistana COVAX vasitəsilə ilk vaksin martın 9-da gəldiyi halda, Ermənistan isə yalnız mart ayının 28-də ilk partiya AstraZeneca vaksinini COVAX vasitəsilə əldə edə bilib. Hətta regiondan kənara çıxsaq, Yaponiya belə vaksinasiyaya mart ayının əvvəllərində başlaya bilmişdi.
Təəssüf ki, COVAX vaksin təminatı edəcəyi ilk ölkələrin siyahısına Azərbaycanı salmayıb. Onlar Şərqi Avropa və Mərkəzi Asiya regionunda ilk partiyaları Gürcüstan, Şimali Makedoniya, Monteneqro, Tacikistan və Özbəkistana müxtəlif sayda AstraZeneca vaksini göndəriblər. COVAX-ın etdiyi vədlərə vaxtında əməl edə bilməməsi narahatlıq doğurur.
Azərbaycan pandemiya ilə mübarizədə ilk gündən qlobal təşəbbüslərlə çıxış edir. Pandemiyanın başladığı ilk dövrlərdə ölkəmiz Qoşulmama Hərəkatına üzv dövlətlərin pandemiya ilə mübarizəsinə dəstək olmaq üçün yardımlar etmiş, Ümumdünya Səhiyyə Təşkilatına əlavə olaraq 5 milyon ABŞ dolları məbləğində vəsait ianə etmişdi.
Azərbaycan ölkələri bərabər şəkildə COVID-19 əleyhinə vaksinlərlə təmin edəcək qurum olan COVAX təsisatına ilk qoşulan ölkələrdən olmuşdu. Bir çox aşağı və orta gəlirli ölkələr vaksini əldə edə bilmədiyi təqdirdə Azərbaycan vaksinasiyaya başlayan öncül ölkələrdən biri olmuşdu. Vətəndaşların sağlamlığını qorumaq, iqtisadiyyatı tez bir zamanda əvvəlki vəziyyətinə gətirmək məqsədilə vaksinin gətirilməsi üçün ölkəmiz ikitərəfli və çoxtərəfli danışıqlar apararaq, ilin əvvəllərində uğurlu siyasətin nəticəsi olaraq Çin istehsalı, Sinovac şirkətinin CoronaVac vaksini ölkəmizə gətirilmişdi.
Son olaraq Azərbaycan hökuməti Qoşulmama Hərəkatına rəhbərlik edən ölkə olaraq COVID-19 pandemiyasına həsr olunmuş BMT-nin Baş Assambleyasının xüsusi sessiyasının keçirilməsinə və “Vaksinlərə əlçatanlıq və insan hüquqları” mövzusunda qətnamənin də hazırlanmasına və qəbul edilməsinə təşəbbüs göstərdi. Sessiyanın təşkilində Azərbaycanın BMT yanındakı daimi nümayəndəliyi yaxından iştirak edərək Azərbaycanın vaksinlərin bölgüsündə ədalətsizliyə qarşı fəallığını ortaya qoydu.
ÜST rəhbəri Azərbaycanın bu addımını alqışlayaraq, öz sosial media hesabından da bu sessiya barəsində paylaşımlar edərək bir daha Azərbaycan hökumətinə və Azərbaycanın BMT yanındakı daimi nümayəndəliyinə öz minnətdarlığını bildirib.
Bundan öncə də yeni növ koronavirusun yayıldığı ilk günlərdə Azərbaycan dövləti qabaqlayıcı tədbirləri vaxtında görərək yoluxma sayının stabil saxlanılmasını bacarmışdı. ÜST Azərbaycanın pandemiya ilə mübarizə tədbirlərini təqdirəlayiq hesab etmiş və ən yaxşı təcrübə olaraq qeyd etmişdi.
Bölmənin digər xəbərləri
