Ekspert: “mygov” platformasına keçid “Rəqəmsal Hökumət 2.0” qlobal konsepsiyasına tam uyğundur
Bakı, 13 fevral, Pərvanə Qafarova, AZƏRTAC
Azərbaycanda dövlət idarəçiliyində rəqəmsal transformasiyaların tətbiqinə yeni yanaşma diqqət mərkəzindədir. Prezident İlham Əliyevin sədrliyi ilə keçirilən “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirədə ölkə başçısı bir sıra önəmli məsələləri diqqətdə saxlamağın vacibliyini vurğuladı. Ən mühüm məsələlərdən biri Azərbaycanda dövlət idarəçiliyində rəqəmsal transformasiyalara yeni baxışın formalaşdırılmasıdır. Bu yanaşma çərçivəsində nazirlər və nazir müavinləri səviyyəsində məsul şəxslərin müəyyənləşdirilməsi və onların öz sahələri üzrə rəqəmsal texnologiyaların tətbiqini koordinasiya etməsi nəzərdə tutulur. Bu, olduqca vacib istiqamətlərdən biridir.
Bu barədə AZƏRTAC-a Rəqəmsal İnkişaf və Nəqliyyat Nazirliyinin İctimai Şurasının üzvü, İT üzrə mütəxəssis Fərid Kazımov deyib.
“İkinci mühüm məsələ “mygov” platformasının “Vahid Pəncərə” formatına tam keçididir. Bu istiqamətdə artıq qərar qəbul edilib. Bundan sonra müxtəlif qurumlar üzrə ayrı-ayrı rəqəmsal həllər deyil, bütün xidmətlər vahid platforma üzərindən - “mygov” vasitəsilə təqdim olunacaq. Bu model istifadəçiyönümlü “Rəqəmsal Hökumət 2.0” qlobal konsepsiyasına tam uyğundur”, – deyə F.Kazımov bildirib.
F.Kazımov, həmçinin təhsilə diqqət çəkib: “Təhsil sistemində texnologiyaya əsaslanan dərin transformasiya nəzərdə tutulur. Bu çərçivədə ali təhsil proqramlarının və sillabusların yenilənməsi gözləniləndir. Eyni zamanda, texnologiyayönümlü müstəqil ali təhsil müəssisəsinin yaradılması da mümkün perspektiv kimi qiymətləndirilə bilər. Reallıq ondan ibarətdir ki, ölkəyə yüksəkixtisaslı mütəxəssislər lazımdır. Mövcud pedaqoji və kadr potensialı hər zaman ən son texnologiyalara cavab verən mütəxəssislərin hazırlanmasına imkan vermir. Buna görə də əlavə ixtisaslaşmış təhsil qurumunun yaradılması zəruri ola bilər. Məsələn, SOCAR-ın Bakı Ali Neft Məktəbinin (BANM) yaradılması kimi modellər bu istiqamətdə nümunə ola bilər”, – deyə ekspert bildirib.
F.Kazımov yerli startapların inkişafına və ixrac potensialının artırılmasına da diqqət çəkib. “Bu çox sevindirici haldır ki, ölkəmizdə İT məhsulların ixracına və startapların inkişafında önəmli rol oynayacaq maliyyə sisteminin qurulması müzakirə olundu. Bu məqsədlə vençur investisiya fondlarının yaradılması, startapların maliyyə təminatının artırılması prioritetlərdəndir. Beləliklə, Azərbaycanda rəqəmsal transformasiya, təhsil və innovasiya sahələrinə diqqətin artırılması dövlət idarəçiliyi və iqtisadi inkişafın yeni mərhələsini formalaşdırır”, - deyə Fərid Kazımov əlavə edib.
Bölmənin digər xəbərləri
