Əlcəzair Fransaya qarşı yeni tədbirlər görməyi planlaşdırır
Paris, 17 aprel, AZƏRTAC
Fransa və Əlcəzair arasında gərginliyin azalmasına olan ümidlər boşa çıxıb, iki ölkə arasında vəziyyət daha da pisləşib.
AZƏRTAC xəbər verir ki, hazırda Əlcəzair Fransanın bu ölkəyə qarşı həyata keçirdiyi cavab tədbirlərini nəzərdən keçirir. Əlcəzairin Xarici İşlər Nazirliyinin nümayəndəsi Sofiane Şaib fransızdilli “Əlcəzair III” radio kanalına “Bizdə müvafiq tədbirlərin tətbiq ediləcəyi şəxslər barədə hələlik dəqiq məlumatlar yoxdur. Buna görə təəssüflənirik. Onların adları məlum olandan sonra addımlar atacağıq”, - deyə bildirib.
O, həmçinin deyib ki, iki ölkə arasında böhranı Fransanın daxili işlər naziri Brüno Rötayo yaradıb. Əlcəzairin Fransadakı konsulluğunun əməkdaşının həbsi vəziyyəti gərginləşdirib. “Əlcəzair və Paris arasında yaranan bu gərginliyə görə Fransanın daxili işlər naziri məsuliyyət daşıyır. O, iki ölkənin rəhbərləri arasında baş tutan telefon danışığından sonra tərəflər arasında başlayan yaxınlaşmaya mane olmaq istəyir. Daxili işlər naziri səkkiz ay əvvəl qeydə alınan bir işi yenidən qızışdırıb və Amir Dzat kimi tanınan Əmir Buxorsun oğurlanması ilə bağlı məsələdən istifadə edib. Mövcud böhran və gərginlik bu işin qəsdən dramatikləşdirilməsinin nəticəsidir. Bu hal iki dövlət başçısının arzuladığı əlaqələrə maneə yaradıb”, - deyə S.Şaib vurğulayıb.
Xatırladaq ki, Fransa və Əlcəzair arasında münasibətlər 2024-cü ilin yayında rəsmi Paris Mərakeşin Qərbi Sahara üzərində suverenliyini tanıyandan sonra pisləşib. Buna cavab olaraq, Əlcəzair Parisdəki səfirini geri çağırıb və Prezident Abdelmacid Tebbun həmin ilin sentyabr ayında Fransaya planlaşdırılan səfərini ləğv edib. Bu yaxınlarda yazıçı Boualem Sansalın Əlcəzairdə həbsi və digər addımlar vəziyyəti daha da gərginləşdirib. Son vaxtlar Əlcəzair tərəfindən həyata keçirilən tədbirlər Fransanın daxili işlər naziri B.Rötayonın və bir neçə digər nazirin qəzəbinə səbəb olub. Fransa hakimiyyəti hətta "fransızların maraqlarını müdafiə etmək" üçün bəzi Əlcəzair rəsmilərinin bu ölkə ərazisinə girişini məhdudlaşdırmaq qərarına gəlib. Bu il Ramazan bayramı münasibətilə prezidentlər Makron və Tebbun arasında telefon danışığı olub. Bundan sonra Fransanın Avropa və xarici işlər naziri aprelin 6-da Əlcəzairə səfər edib. Bununla da, iki ölkə arasında “bərabər münasibətlərdə yeni mərhələ”nin başlandığı bildirilib. Lakin Əlcəzairin Fransadakı konsulluğunun əməkdaşının həbsindən sonra vəziyyət yenidən gərginləşib. Əlcəzair 12 fransızı ölkədən qovub. Buna cavab olaraq, Fransanın Əlcəzairdəki səfiri Stefan Romate məsləhətləşmələr üçün geri çağırılıb. Həmçinin Əlcəzairin Fransadakı diplomatik nümayəndəliklərində çalışan 12 nəfərin bu ölkədən çıxarılmasına dair qərar qəbul edilib.
Bölmənin digər xəbərləri
