Əlcəzair Qoşulmama Hərəkatının növbəti Zirvə görüşünə ev sahibliyi etmək niyyətindədir
Qahirə, 12 oktyabr, AZƏRTAC
Əlcəzair Qoşulmama Hərəkatının növbəti Zirvə görüşünə ev sahibliyi etmək istəyir. APS agentliyi xəbər verir ki, bu təkliflə Əlcəzairin Baş naziri Aymen Benəbderəhman Serbiyanın paytaxtı Belqradda Qoşulmama Hərəkatının 60 illiyinə həsr edilmiş Yüksək Səviyyəli Toplantıda çıxış edib. O bildirib ki, son illər Azərbaycanın sədrik etdiyi hərəkatın qlobal əhəmiyyəti artıb və burada qlobal problemlər müzakirə olunur.
AZƏRTAC xəbər verir ki, Qoşulmama Hərəkatının Belqrad toplantısında Ərəb Dövlətləri Liqasının baş katibi Əhməd Əbul Ğeyt, İraqın xarici işlər naziri Fuad Hüseyn, Səudiyyə Ərəbistanının xarici işlər naziri Faysal bin Fərhan, Yəmənin xarici işlər naziri Əhməd Avad bin Mübarək və ərəb ölkələrinin digər rəsmiləri də toplantı çərçivəsində keçirdikləri görüşlərdə Yaxın Şərq regionunda mövcud olan problemlərin həlli yollarını müzakirə ediblər.
Azərbaycan Prezidenti İlham Əliyevin toplantıda videoformatda çıxışının əsas məqamları ərəb ölkələrinin mətbuatında geniş şəkildə işıqlandırılıb. Misirin “Əl Masr əl Yom, Küveytin “Dəsman” portalları, Əlcəzairin APS agentliyi, Tunisin TAP agentliyi və digər KİV-lərin xəbərlərində dövlətimizin başçısının Qoşulmama Hərəkatı çərçivəsində COVID-19 pandemiyası ilə mübarizə sahəsində görülmüş mühüm işlər, o cümlədən üzv dövlətlərin əsas humanitar və tibbi ehtiyaclarını əhatə edən məlumat bazasının yaradılması, Azərbaycanın təklifi əsasında BMT Baş Assambleyasının dövlət və hökumət başçıları səviyyəsində xüsusi sessiyasının keçirilməsi barədə fikirləri yer alıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
