Əldə olunan uğurlar Azərbaycan vətəndaşında dövlətə inamı daha da artırıb ŞƏRH
Bakı, 20 iyul, AZƏRTAC
Mürəkkəb geosiyasi şəraitdə yerləşən Azərbaycanın müstəqil siyasət yürütməsi, milli maraqları ardıcıl şəkildə müdafiə etməsi və beynəlxalq münasibətlərdə bərabərhüquqlu əməkdaşlıq prinsipinə sadiq qalması cəmiyyət tərəfindən yüksək qiymətləndirilir. Dövlət maraqlarının bütün qərarların əsas meyarına çevrilməsi ölkə daxilində sabit siyasi etimad mühitinin formalaşmasına mühüm təsir göstərib. Prezident İlham Əliyevə göstərilən yüksək etimadın digər mühüm səbəbi xalqla dövlət başçısı arasında yaranmış qarşılıqlı inamdır. Sosial rifahın yüksəldilməsi, bölgələrin inkişafı, yeni infrastrukturun qurulması, milli təhlükəsizliyin möhkəmləndirilməsi və dövlətçiliyin gücləndirilməsi istiqamətində görülən işlər insanların gündəlik həyatında hiss olunur. Məhz buna görə də dövlət siyasəti cəmiyyət tərəfindən uzaq perspektivli proqram kimi deyil, real nəticələr verən fəaliyyət kimi qəbul edilir.
Bu sözləri AZƏRTAC-a açıqlamasında Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov deyib.
O bildirib ki, Prezident İlham Əliyevin rəhbərliyi dövründə klassik dövlətçilik ənənələri ilə müasir inkişaf istiqamətləri arasında uğurlu tarazlıq yaradılıb. Milli-mənəvi dəyərlərin qorunması, azərbaycançılıq ideologiyasına sadiqlik, tarixi irsə hörmət və dövlətçilik ənənələrinin yaşadılması innovasiya, rəqəmsal inkişaf, müasir iqtisadiyyat və yaşıl enerji siyasəti ilə uzlaşdırılır. Eyni zamanda, Ümummilli Lider Heydər Əliyevin müəyyən etdiyi dövlətçilik kursunun müasir dövrün tələblərinə uyğun davam etdirilməsi siyasi varislik prinsipinə sadiqliyin ifadəsi kimi qəbul olunur. Yüksək ictimai etimadın mühüm dayaqlarından biri də ölkənin iqtisadi inkişafıdır. Son illərdə iqtisadi potensialın möhkəmlənməsi, regionların sürətli inkişafı, müasir infrastrukturun yaradılması, enerji və nəqliyyat layihələrinin uğurla həyata keçirilməsi Azərbaycanın iqtisadi müstəqilliyini daha da gücləndirib. Güclü iqtisadiyyat müasir ordunun formalaşdırılması, sosial layihələrin genişləndirilməsi və uzunmüddətli inkişaf proqramlarının həyata keçirilməsi üçün etibarlı əsas yaradıb.
“44 günlük Vətən müharibəsində əldə edilən Zəfər ölkənin müasir tarixində yeni mərhələnin başlanğıcı oldu. Qarabağın işğaldan azad edilməsi, ardınca bütün ölkə ərazisində dövlət suverenliyinin təmin olunması xalqın illərlə gözlədiyi tarixi ədalətin bərpası kimi qarşılandı. Bu Qələbə yalnız siyasi və hərbi uğur olmadı. O, cəmiyyətin mənəvi dünyasını dəyişdi, özünəinamı gücləndirdi və qalib xalq düşüncəsini möhkəmləndirdi. Azərbaycan vətəndaşı dövlətinin gücünü, ordusunun qüdrətini və milli birliyin əsl nəticəsini gördü. Gələcəyə inam daha da artdı. Cəmiyyətdə belə bir əminlik yarandı ki, milli maraqlara söykənən ardıcıl siyasət qarşıya qoyulan digər strateji məqsədlərin də həyata keçməsinə imkan verəcək. Azərbaycanın beynəlxalq nüfuzunun yüksəlməsi də bu etimadı gücləndirən mühüm amillərdəndir. Regional və qlobal proseslərdə artan rol, enerji təhlükəsizliyinə verdiyi töhfə, beynəlxalq nəqliyyat dəhlizlərinin inkişafında oynadığı mühüm mövqe və etibarlı tərəfdaş kimi qazandığı nüfuz ölkənin beynəlxalq mövqeyini əhəmiyyətli dərəcədə möhkəmləndirib. Bu uğurlar Azərbaycan vətəndaşında dövlətinə və onun həyata keçirdiyi xarici siyasətə inamı daha da artırıb”, - deyə S.Qurbanov vurğulayıb.
Komitə sədri deyib ki, milli maraqlara söykənən idarəçilik, xalqla möhkəm qarşılıqlı etimad, Ulu Öndər Heydər Əliyev siyasi məktəbinə sədaqət, sözlə əməl arasında ardıcıllıq, iqtisadi inkişaf, güclü dövlət və ordu, tarixi Zəfər, cəmiyyətdə yaranmış yeni mənəvi yüksəliş və Azərbaycanın beynəlxalq mövqeyinin güclənməsi Prezident İlham Əliyevin yüksək ictimai dəstəyə malik siyasi Lider kimi qəbul edilməsinin əsas səbəblərini təşkil edir.
Bölmənin digər xəbərləri
