ƏLƏT-QAZIMƏMMƏD AVTOMOBİL YOLUNUN TƏNTƏNƏLİ AÇILIŞ MƏRASİMİ
X X X
Azərbaycan Respublikasının Prezidenti İlham Əliyev mərasimdə nitq söylədi.
(Dövlətimizin başçısının nitqi qəzetin bugünkü nömrəsinin birinci səhifəsində dərc olunur).
X X X
ZİYA MƏMMƏDOV: Möhtərəm hörmətli Prezident, icazə verin, mərasim iştirakçıları adından və Azərbaycanın nəqliyyatçıları adından bu mərasimə təşrif gətirdiyinizə, uğurlar dilədiyinizə görə və ümumiyyətlə, bütün nəqliyyatçılara göstərdiyiniz yüksək diqqətə, qayğıya görə Sizə bir daha dərin təşəkkürümüzü bildirək. Allah-Təaladan Sizə uzun ömür, möhkəm cansağlığı arzulayaq və Sizi əmin edək ki, nəqliyyatçılar həmişə olduğu kimi, bundan sonra da ölkəmizdə həyata keçirdiyiniz siyasəti daim dəstəkləyəcək, daxili, həm də xarici siyasətinizin reallaşmasında Sizə yardımçı olacaqlar.
X X X
Sonra Prezident İlham Əliyev Azərbaycanı Gürcüstan, Rusiya və İranla birləşdirən magistral yolların tikintisi ilə əlaqədar hazırlanmış layihələrlə və xəritələrlə yaxından tanış oldu.
Prezident İlham Əliyevə məlumat verildi ki, hazırda nəzərdə tutulan yolların inşası üçün dövlət büdcəsindən Nəqliyyat Nazirliyinə ayrılan vəsait hesabına işlər görülür. Gürcüstanla sərhədə qədər bütün layihələr hazırlanmış, maliyyə mənbələri tapılmışdır. Qazax və Gürcüstan arasındakı 38 kilometrlik yolun tikintisinə Avropa Yenidənqurma və İnkişaf Bankı maraq göstərir. Bütövlükdə layihə üzrə nəzərdə tutulur ki, Bakıdan Gürcüstan sərhədinədək ərazidə Kürdəmir, Şəmkir və Qazax şəhərlərinə daxil olmamaq şərtilə dairəvi yollar salınacaqdır. Bu marşrutun ümumi uzunluğu 515 kilometr olacaqdır.
İLHAM ƏLİYEV: Ümumiyyətlə, bu yol neçə hissəyə bölünübdür?
ZİYA MƏMMƏDOV: Cənab Prezident, əsasən, şəhərin girişi, Bakı-Ələt, Ələt-Qazıməmməd, Qazıməmməd-Kürdəmir, Kürdəmir-Ucar, Ucar-Yevlax, Yevlax-Gəncə, Gəncə-Qazax hissələrinə bölünür.
İLHAM ƏLİYEV: Dairəvi yolun tikintisinə nə vaxt başlanacaqdır?
ZİYA MƏMMƏDOV: Bu ilin sonunadək başlanacaqdır. Maliyyə məsələsinə Küveyt Fondu kömək edəcəkdir. Digər hissələrdə artıq işlərə başlanıbdır. Dairəvi yolun çəkilişi bizim üçün ən vacibdir və Küveyt Fondu söz verib ki, bunu maliyyələşdirdikdən sonra digər hissələrə də vəsait ayıracaqdır. Bütün texniki göstəricilər və maliyyə mənbələri bu xəritədə göstərilibdir.
İLHAM ƏLİYEV: Ən çox maliyyə dəstəyini verən hansı qurumlardır?
ABİD ŞƏRİFOV (Baş nazirin müavini): Cənab Prezident, Küveyt Fondu 125 milyon dollardan çox veribdir.
İLHAM ƏLİYEV: 2007-ci ilədək hansı layihələr nəzərdə tutulur?
ZİYA MƏMMƏDOV: Cənab Prezident, əgər layihələrin maliyyələşməsi məsələsi sürətlənsə, texniki imkanlarımız imkan verəcək ki, bütün işlərə başlayaq. Bunun üçün hər bir şey hazırdır.
İLHAM ƏLİYEV: Bunu tezləşdirməyə çalışmaq lazımdır.
ABİD ŞƏRİFOV: Bəli, 2006-cı ilədək qurtarmağa çalışacağıq.
İLHAM ƏLİYEV: Yəqin ki, yolların hamısı bu səviyyədə tikiləcəkdir.
ZİYA MƏMMƏDOV: Bəli, indi istifadəyə verdiyiniz bu yol birinci dərəcəli yoldur. Dördzolaqlıdır, amma Hacıqabuldan Gürcüstanın sərhədinə qədər layihələrdə ikinci dərəcəli yolun tikintisi nəzərdə tutulmuşdur. Yəni, ikizolaqlı olacaqdır. Layihədə dördzolaqlıdır, ancaq maliyyə iki zolaq üçün nəzərdə tutulmuşdur.
İLHAM ƏLİYEV: Deməli, əgər sonra maliyyə tapılarsa, yerdə qalan iki zolaq da inşa olunacaqdır. Yəqin bunların zolaqları enlidir, təqribən neçə metrdir?
ZİYA MƏMMƏDOV: İstismar olunan yolun eni 15 metrdir.
İLHAM ƏLİYEV: İndi, demək olar ki, bu yolun maliyyə problemləri həll olunubdur. Digər yollar, Rusiya, İran sərhədlərinədək yollar qalır. Bilirəm ki, bu sahədə danışıqlar aparırsınız.
ZİYA MƏMMƏDOV: Bəli, bu məsələyə Kanadanın, Çexiyanın investisiya bankları, başqaları da maraq göstərir. Hazırda danışıqlar aparılır. Bu sahədə texniki-iqtisadi əsaslandırma yoxdur. Amma Almaniyanın bir şirkəti ilkin layihə hazırlayıbdır.
İLHAM ƏLİYEV: Burada da yolun marşrutu dəyişməlidir. Çünki əsas yol şəhərlərə girməməlidir. Bunu nəzərə almaq lazımdır. Rusiya istiqamətində işlər necədir, Bakı-Sumqayıt yolu bərpa olunur?
ZİYA MƏMMƏDOV: Bəli, bu işlə çox ciddi məşğuluq. 31 kilometrlik məsafədə dördzolaqlı birinci dərəcəli yol olacaqdır.
ABİD ŞƏRİFOV: Cənab Prezident, Sizin göstərişinizlə ilk dəfə olaraq, bu ildən etibarən Nəqliyyat Nazirliyinə yolların tikintisi üçün vəsait ayrılıbdır. Həmin yol üçün 30 milyard manat nəzərdə tutulmuşdur. Cənub istiqamətində tikintiyə isə 18 milyard manat nəzərdə tutulubdur.
İLHAM ƏLİYEV: Siz bu vəsaitlə nə edəcəksiniz?
ZİYA MƏMMƏDOV: Cənab Prezident, istəyirik həm texniki-iqtisadi layihəni hazırlayaq, həm də pərakəndəlik olmasın deyə, Bakı-Sumqayıt yolunu tam bərpa edək.
İLHAM ƏLİYEV: Bəli, məsafə az olsun, amma keyfiyyətli olsun ki, sonradan bunu təzədən tikməyə ehtiyac olmasın. Siyəzəndə, Dəvəçidə də marşrutda dəyişiklik edilməlidir. Bunun müqabilində yolun məsafəsi azalacaqdır. Cənub istiqamətində Astaraya yol Ələtdən gələcəkdir?
ZİYA MƏMMƏDOV: Cənab Prezident, biz bu xəttə artıq başlamışıq. 313 kilometrlik yoldur və köhnə marşrutla gedəcəkdir. İranın Bakıdakı səfiri Sizə müraciət etmişdi. Sizin verdiyiniz tapşırıqdan sonra bu işin icrasına artıq başlamışıq, tikinti gedir.
İLHAM ƏLİYEV: Bəli, o yol tamamilə bərbad idi. Eyni zamanda, həmin yoldan şəhərlərə, rayon mərkəzlərinə yol salınmalıdır. Bunları nəzərə alın. Hər birinə giriş-çıxış qoyulsun. Gələcəkdə biz özümüz də vəsait ayıra bilərik. Harada imkan var, kredit götürmək lazımdır, harada yoxdur, onu biz özümüz edərik. Əsas magistral yollara da fikir vermək lazımdır. Yevlax-Mingəçevir, Bakı-Şamaxı yolları və başqaları da yaxşı vəziyyətdə deyildir. Bu yollarda da təmir-tikinti işləri aparılmalıdır. Ümumiyyətlə, gediş-gəliş çox olan yolların bərpası lazımdır. Çünki bunlar respublika, dövlət əhəmiyyətli yollardır.
ZİYA MƏMMƏDOV: Cənab Prezident, Sizin qəbul etdiyiniz proqram əsasında digər yolların da bərpa olunması nəzərdə tutulur. Vəsait imkanı yarandıqca bu işləri yerinə yetirəcəyik.
Bölmənin digər xəbərləri
