Bakı, 11 may, AZƏRTAC

Ümummilli lider Heydər Əliyevin Azərbaycanın müstəqil dövlətçilik tarixindəki yeri və rolu müstəsnadır. Heydər Əliyevin şəxsi ləyaqət hissini paklıq zirvəsinə qaldırmağı bacaran və bu unikal keyfiyyəti siyasi fəaliyyətinin məhək daşına çevirməyi bacaran böyük azərbaycanlı idi. Ulu Öndər Azərbaycanda siyasi plüralizm, siyasi mədəniyyət və siyasi sistemin yaranmasının əsasını qoyan bir dühadır.

Bu sözləri AZƏRTAC-a Milli Məclisin deputatı, YAP Beynəlxalq Əlaqələr Komissiyasının katibi, siyasi elmlər doktoru, professor Elman Nəsirov söyləyib.

Onun sözlərinə görə, Heydər Əliyev 1992-ci ildə bir müxalifət partiyası kimi yaratdığı Yeni Azərbaycan Partiyası hakimiyyətə sivil yolla gəlməyin əsl “yol xəritəsi”ni ortaya qoydu. O, müstəqil dövlət quruculuğu prosesini həyata keçirməklə bərabər, vahid məqsəd, məram uğrunda bizi bir araya gətirən azərbaycançılıq ideologiyasının əsasını qoydu. Çünki azərbaycançılıq ideologiyası məhz onun dövründə həqiqi siyasi-ideoloji məzmun qazanaraq, mükəmməl bir dövlətçilik təliminə çevrildi və müstəqil Azərbaycan Respublikasının dövlət ideologiyası səviyyəsinə yüksəldi və dövlət siyasətinin prioritetinə çevrildi.

YAP Beynəlxalq Əlaqələr Komissiyasının katibi qeyd edib ki, Heydər Əliyev 1993-cü ildə yenidən Azərbaycanın rəhbərliyinə qayıdarkən dolğun dövlət konsepsiyasına malik bir siyasətçi idi. Bu konsepsiyanın bəzi tezisləri onun 1992-ci ildə Azərbaycan ziyalılarına ünvanlanmış müraciətində və elə həmin il qəbul edilmiş Yeni Azərbaycan Partiyasının proqramında öz əksini tapdı. Bu proqram xarakterli müraciətdə dövrün real ictimai-siyasi vəziyyəti, müstəqil dövlət quruculuğunun şərtləri, regionumuzda və beynəlxalq aləmdə cərəyan edən hadisələrin və yaşanan proseslərin xarakteri, Azərbaycanın daxili vəziyyəti, siyasi və iqtisadi böhran, eləcə də vəziyyətdən çıxış yolları öz əksini tapdı. Professor fikirlərini faktlarla əsaslandıraraq bildirib: “Heydər Əliyev 1993-cü il oktyabrın 3-də keçiriləcək prezident seçkilərindən əvvəl demək olar ki, əhalinin bütün təbəqələri ilə görüşməyə çalışırdı. Azərbaycan Prezidentliyinə namizəd Heydər Əliyev 1993-cü il sentyabrın 10-da yerli və xarici jurnalistlər üçün mətbuat konfransı keçirdi. Sentyabrın 20-də Azərbaycan Daxili İşlər Nazirliyinin əməkdaşları, sentyabrın 21-də AMEA-da ziyalılar qarşısında, sentyabrın 22-də Ali Sovetdə Azərbaycan gənclərinin nümayəndələri, sentyabrın 28-də Bakı Məişət Kondisionerləri zavodunda əmək kollektivlərinin təmsilçiləri qarşısında çıxışlar etdi. Bu çıxışlarda Heydər Əliyev prezident seçiləcəyi təqdirdə, xalqı narahat edən hansı mürəkkəb problemlərin köklü həllinə nail olmağı hədəf seçdiyini bəyan etdi. Bu, ilk növbədə, polisin siyasi oyunbazlıqla məşğul olmaması və ictimai asayişin qorunması ilə bağlı birbaşa vəzifəsini icra etməsi, müxtəlif rayonlarda kök salmış və dinc sakinləri qorxu altında saxlayan çoxsaylı gizli silahlı qrupların və bandaların üzə çıxarılması, onların ifşa və tərksilah edilməsi ilə bağlı idi”.

E.Nəsirov diqqətə çatdırıb ki, ziyalılar qarşısında çıxış edən Heydər Əliyev ideoloji stereotiplərdən və təhriflərdən azad olmuş real və həqiqi Azərbaycan tarixinin yazılmasını təxirəsalınmaz vəzifə kimi qarşıya qoydu. Ulu Öndər xüsusi olaraq vurğuladı ki, tarixi qələmə alarkən ədalət hissini bir an yaddan çıxarmaq olmaz. Tarixi təhrif edənlər xalqa xəyanət edir. Ulu Öndər öz ədalətli mövqeyi ilə insanların məhəbbətini qazanmışdı. Çünki xalqın gözü tərəzidir. Ölkəsinin 20 faizi işğal olunan və çətin vəziyyətdə yaşayan xalq Heydər Əliyevə yeganə ümid yeri kimi baxırdı. 1993-cü il oktyabrın 3-də keçirilən prezident seçkilərində xalqın 98,8 faiz səsini toplayaraq hakimiyyət başına gələn Ulu Öndər Azərbaycan dövlətçiliyini məhv olmaqdan xilas etdi, onun növbəti intibahının əsasını qoydu.

Gənclər qarşısında çıxışında isə ulu öndər Heydər Əliyev ölkənin təhsil və gənclər siyasəti sahəsində həllini gözləyən olduqca mürəkkəb problemlərə diqqəti cəlb etdi və bu istiqamətlərdə konseptual yanaşmalarını ortaya qoydu. İlk növbədə onu vurğuladı ki, milli nihilizm mövqeyindən birdəfəlik imtina etmək lazımdır. Gənclərin dünyanın nüfuzlu ali təhsil ocaqlarında təhsil almasına böyük önəm verən dahi lider gənc nəslə daim qayğı göstərirdi. Təsadüfi deyildir ki, bu gün MDB məkanında Azərbaycan diasporunun sosial tərkibinin böyük bir hissəsini məhz həmin illərdə Ulu Öndərin xeyir-duası ilə təhsil almış insanlar təşkil edir və onlar müstəqil dövlətimizin maraqlarını təmsil olduqları ölkələrdə şərəflə qoruyurlar.

Diqqətə çatdırıb ki, “Xalq həmişə öz ziyalıları, öz mədəniyyəti, öz elmi ilə tanınır”, - deyən ümummilli lider Heydər Əliyevin rəhbərliyi dövründə təhsil, səhiyyə, mədəniyyət, incəsənət və milli-mənəvi dəyərlərimizin qorunması və inkişafı sahəsində son dərəcə mühüm işlər görülmüşdü. Bu gün vətəninin sevən hər bir azərbaycanlı xalqımız üçün gördüyü dəyərli xidmətlərinə görə Heydər Əliyevə minnətdardır. Çünki dahi lider bizə zəngin irs və miras qoyub. Heydər Əliyev böyük siyasi ustalıqla 59 yaşında pantürkist-millətçi ittihamı ilə Sibirə sürgün edilən dahi Hüseyn Cavidin nəşini 100 illiyində Vətənə gətirməklə əslində milli hissə və duyğuya malik olan şəxsiyyətlərin hamısının cənazəsini, ruhunu öz doğma vətənlərinə-Azərbaycana qaytarmış oldu.

Bildirib ki, Ümummilli Lider Azərbaycanda demokratik inkişaf proseslərinin də əsasını qoydu. Ölkəmizdə şəxsiyyətin azadlığı və toxunulmazlığı, habelə onların hüquqi müdafiəsi təmin edildi, çoxpartiyalı sistem üçün əsaslar yaradıldı, siyasi plüralizm, vicdan və etiqad azadlığı, azlıqların hüquqları, qanun qarşısında bərabərlik təmin edildi. Azərbaycan Respublikasının qanunvericilik aktlarında əks olunan, onun ayrılmaz komponenti olan təqsirsizlik prezumpsiyası təmin edildi. Bundan savayı, Konstitusiya Məhkəməsi, üçpilləli məhkəmə sistemi, yeni məhkəmə korpusu yaradıldı, məhkəmələrin müstəqilliyi və prosedur qaydalarının şəffaflaşması təmin edildi, on minlərlə insan amnistiya edildi və böyük sayda məhkum bağışlandı, senzura ləğv edildi, KİV-lərin azadlığı və QHT-lərin sərbəst fəaliyyəti təmin edildi.

“Azərbaycan xalqı qəlbində əbədi heykəlini qoyduğu Ulu Öndərin xatirəsini daim uca tutur. Heydər Əliyevin qoyduğu zəngin irs qorunur. Müasir və müstəqil Azərbaycan Ulu Öndərin layiqli davamçısı, milli maraqları hər şeydən üstün tutan Prezident İlham Əliyevin müdrik və uzaqgörən siyasəti sayəsində gələcəyə doğru inamla irəliləyir”, - deyə Elman Nəsirov vurğulayıb.