“Elmin cazibəsi” silsilə nəşrinin 3-cü nömrəsi çapdan çıxıb
Bakı, 23 iyun, AZƏRTAC
Elm və Təhsil Nazirliyinin Geologiya və Geofizika İnstitutunun baş direktoru akademik Akif Əlizadənin layihə rəhbəri olduğu “Elmin cazibəsi” silsilə nəşrinin 3-cü nömrəsi çapdan çıxıb.
İnstitutdan AZƏRTAC-a bildirilib ki, İctimaiyyətlə əlaqələr şöbəsinin müdiri Şirməmməd Nəzərlinin “Elm” nəşriyyatında hazırlanmış “Elmin cazibəsi-3” kitabı “Afpoliqraf” mətbəəsində işıq üzü görüb. Nəşrin “Ön söz”ünün müəllifi və rəyçisi akademik Əkpər Feyzullayev, redaktoru yer elmləri üzrə fəlsəfə doktoru Zəki Vəliyevdir.
Kitabda “Azərbaycan Respublikası Elm və Təhsil Nazirliyinin Təbiət Tarixi Muzeyi”, “Geologiya və Geofizika İnstitutunun Geoloji-Mineraloji Muzeyi” başlıqlı materiallar, eləcə də oxucu suallarına cavab qismində “Rəngli qumlar”, “Qarışmayan su hövzələri” elmi məqalələri yer alıb. Nəşrin “İnformasiya” bölməsində Geologiya və Geofizika İnstitutunun 2022-ci ildəki əsas elmi nailiyyətlərindən bəzi materiallar, həmçinin institutun elmi nəşrləri təqdim edilir.
Geniş müsahibə formatında hazırlanmış elmi mətnlərlə yanaşı, kitabda müəllifin orijinal fotoları, həmçinin arxiv şəkilləri yer alıb.
Kitab alimlər, tələbələr, eləcə də geniş ictimaiyyət üçün nəzərdə tutulub.
Bölmənin digər xəbərləri
