Elmin İnkişafı Fondu ilə “Elsevier” şirkəti arasında əməkdaşlıq haqqında memorandum imzalanıb
Bakı, 24 aprel, K.Əliyeva, AZƏRTAC
Aprelin 24-də Azərbaycan Respublikasının Prezidenti yanında Elmin İnkişafı Fondu (EİF) ilə dünyanın ən iri elmi informasiya, təhlil və nəşr şirkətlərindən olan “Elsevier” arasında əməkdaşlıq haqqında memorandum imzalanıb.
AZƏRTAC xəbər verir ki, sənədi Elmin İnkişafı Fondunun icraçı direktoru Elçin Babayev və “Elsevier” şirkətinin vitse-prezidenti Feliks Heyst imzalayıblar.
Memoranduma əsasən, tərəflər birgə təlimlər (alimlər, elmi jurnal redaktorları, fondun əməkdaşları üçün), müxtəlif xarakterli tədbirlər keçirəcək, elm-texnologiya, innovasiya və sənaye/biznes arasında əlaqələrin gücləndirilməsinə, elmi nəticələrin kommersiyalaşdırılmasına, texnologiyaların transferinə kömək edən işlərin yerinə yetirilməsində səylərini birləşdirəcəklər. Həmçinin tərəflər elmi ekspertiza işinin təşkili, elmi verilənlər bazasının yaradılması, sərgilərin təşkili kimi məsələlərdə əməkdaşlıq edəcəklər. Dünyanın ən iri elmi referatlar və məqalə məzmununa giriş bazası olan “Scopus” və aparıcı məlumat platforması sayılan “ScienceDirect”dən istifadə qaydaları, onların alimlər, tədqiqatçılar, tələbələr üçün üstünlükləri, bu platformalar üzərində son illərdə aparılan təkmilləşdirilmə və yeniliklər barədə mütəmadi məlumat veriləcək, bu elmi şəbəkədən istifadənin Azərbaycan üzrə olan göstəriciləri nümayiş etdiriləcək. Azərbaycan alimlərinin qərbdə nəşr olunan elmi jurnallara göndərilmək üçün hazırladıqları məqalələrin tərtibatına kömək, “Elsevier”in məlumat bazası əsasında Azərbaycan alimlərinin elmi göstəricilərini müqayisəli əks etdirəcək ətraflı hesabatların müntəzəm hazırlanması, həmçinin son illərdə geniş yayılmış “yırtıcı” jurnallar haqqında məlumatların çatdırılması da tərəflər arasında razılaşdırılıb.
İmzalanma mərasimində “Elsevier”in Mərkəzi Asiya ölkələri və Azərbaycan üzrə regional direktoru xanım Aliyə Ospanova, qurumun Orta Şərq və Mərkəzi Asiya ölkələri, Türkiyə, İran üzrə regional direktoru Tayfun Basal iştirak ediblər.
E.Babayev ölkəmizdə elmin inkişafına dövlət qayğısından danışıb, alimlərimizin qarşısında Azərbaycanın regionda elm mərkəzinə çevrilməsi kimi ciddi vəzifənin qoyulduğunu bildirib. Bu vəzifənin yerinə yetirilməsində tədqiqatçı alim və mütəxəssislər üçün hər cür şəraitin yaradıldığını söyləyən EİF-in icraçı direktoru deyib ki, bunun bir yolu qrantların verilməsidirsə, digər yolu alimlərin elmi məlumat bazalarına çıxışının təmin edilməsidir. Elmin İnkişafı Fondu bu istiqamətdə töhfəsini verməyə çalışır və dünyanın mötəbər nəşriyyatları, akademik qurumları və eyni zamanda, məlumat bazası təqdim edən xüsusi şirkətlərlə əlaqələr qurur, beləliklə, məlumat mənbələrinə çıxışlardan istifadə üzrə təlimlərin keçirilməsini və s. öhdəsinə götürür. Bu təşəbbüslər Azərbaycanın dünya elminə açıq olduğunu və dünya elminin uğurlarını mənimsəmək istiqamətində qəti addımlar atdığını bir daha təsdiqləyir.
“Elsevier” şirkətinin vitse-prezidenti F.Heyst təmsil etdiyi qurum haqqında ətraflı məlumat verib, EİF ilə əməkdaşlığın “Elsevier” şirkəti üçün əhəmiyyətini xüsusilə vurğulayıb. Bildirilib ki, 1880-ci ildə Hollandiyada əsası qoyulmuş “Elsevier” şirkəti sıralarında “ScienceDirect”, “Scopus”, “Elsevier Research Intelligence” və “Clinical Key” kimi mükəmməl elektron xidmətlərin olduğu veb-bazanı, rəqəmsal həllər və “The Lancet” və “Cell” kimi məşhur nəşrləri əhatə edən təxminən 2500 jurnal və 33 mindən çox elektron kitabı elmi tədqiqatçıların istifadəsinə təqdim edir.
F.Heyst deyib ki, “Elsevier” elm, səhiyyə, hüquq və risk sektorları üçün fərqli həlləri təmin edən, dünya liderlərindən sayılan, informasiya həlləri təminatçısı olan RELX Group” şirkətlərindən biridir. “Scopus” isə dünyanın ən geniş əhatə dairəsinə malik akademik məlumatlar bazasıdır, bibliometrik vasitələrlə tədqiqatçıların elmi araşdırmalarının izlənilməsinə, təhlilinə, vizuallaşdırılmasına kömək göstərir və özündə texnologiya, tibb, ictimai elmlər, incəsənət, humanitar elm sahələrinə dair beş mindən çox nəşrin 22 mindən çox başlığını birləşdirir. “Elsevier” dünya üzrə elmi jurnallarda nəşr olunan məqalələrin təqribən 25 faizini çap edir, həmçinin iki mindən çox elmi jurnal buraxır və özünün elektron internet portalında 11 milyondan çox elmi məqalə ilə tanışlığa imkan yaradır. Nəşriyyat dünyanın 180 ölkəsindən olan 4500-dən çox quruma (akademiyalar, elmi-tədqiqat müəssisələri, universitetlər, kitabxanalar və s.) xidmət göstərir. “Elsevier”in 30 milyona yaxın istifadəçisi var.
Sonda iki qurum arasında əməkdaşlıq haqqında memorandum imzalanıb.
Bölmənin digər xəbərləri
