Əlyazmalar İnstitutu və Özbəkistan alimləri ortaq irsi araşdırırlar
Bakı, 27 avqust AZƏRTAC
Azərbaycan-Özbəkistan münasibətlərində ortaq tarix, dil, ədəbiyyat və mənəvi dəyərlər xüsusi yer tutur. Bu baxımdan əlyazma irsinin birgə araşdırılması və elmi dövriyyəyə daxil edilməsi iki ölkənin alimləri qarşısında duran əsas vəzifələrdəndir.
Bu fikri AZƏRTAC-a açıqlamasında AMEA-nın Əlyazmalar İnstitutunun direktoru akademik Teymur Kərimli söyləyib. Direktor bildirib ki, Əlyazmalar İnstitutu ilə Əlişir Nəvai adına Daşkənd Dövlət Özbək Dili və Ədəbiyyatı Universiteti arasında əməkdaşlıq memorandumu imzalanıb. Sənəd Azərbaycan və Özbəkistan alimləri arasında elmi əlaqələrin genişləndirilməsini, birgə tədqiqatların aparılmasını və qarşılıqlı elmi-mədəni layihələrin həyata keçirilməsini nəzərdə tutur. Əlyazmalar İnstitutunun alimləri Özbəkistanda keçirilən beynəlxalq konqres və forumlarda mütəmadi olaraq iştirak edirlər. İnstitut əməkdaşları Səmərqənd və Daşkənd şəhərlərində təşkil olunan beynəlxalq elmi tədbirlərdə Azərbaycan əlyazma fondlarında qorunan Əlişir Nəvai əsərləri, Azərbaycan-Özbəkistan ədəbi əlaqələri, Şərq yazılı irsi və əlyazmaşünaslıq məsələləri ilə bağlı məruzələrlə çıxış ediblər. Səmərqənddə “Böyük əcdadların mirası – Üçüncü intibahın əsasıdır” mövzusunda VIII beynəlxalq konqresdə, Daşkənddə “Böyük keçmişin irsi – işıqlı gələcəyin təməli” adlı beynəlxalq ekspert forumunda Əlyazmalar İnstitutunun əməkdaşları ölkəmizi təmsil ediblər.
Eyni zamanda, Özbəkistanın tanınmış alimləri və elmi müəssisələrinin nümayəndələri Əlyazmalar İnstitutunda olub, burada qorunan yazılı abidələr, aparılan elmi-tədqiqat işləri və institutun yeni nəşrləri ilə tanış olublar. Özbəkistanlı alimlərin iştirakı ilə əlyazmaşünaslıq, mətnşünaslıq, tarix, ədəbiyyat və mədəni irslə bağlı elmi müzakirələr keçirilib. Əlyazmalar İnstitutunun əməkdaşlarının Özbəkistanda keçirilən mədəni-ədəbi tədbirlərdə iştirakı da ikitərəfli əlaqələrin mühüm istiqamətlərindəndir. Nəsiminin 650 illiyi ilə bağlı Daşkənddə təşkil olunmuş “Canımı qıldım fəda” adlı poeziya axşamında institutun nümayəndəsi iştirak edib. Tədbirdə “Nəsimi yaradıcılığı rəsmlərdə, fotolarda, əlyazmalarda” adlı sərgi nümayiş etdirilib. Bununla yanaşı, Azərbaycan və Özbəkistan alimlərinin iştirakı ilə müxtəlif beynəlxalq konfranslarda iki ölkənin ortaq ədəbi-mədəni irsi, Əlişir Nəvai və Azərbaycan klassikləri, Şərq dilləri və mədəniyyətlərarası dialoq məsələləri müzakirə olunub.
Müxbir - Tünzalə Arazlı
Bölmənin digər xəbərləri
