Əmlak Məsələləri Dövlət Komitəsinin nümayəndələri BMT-nin Avropa İqtisadi Komissiyasının sessiyasında iştirak etmişlər
Bakı, 4 noyabr (AZƏRTAC). Əmlak Məsələləri Dövlət Komitəsinin (ƏMDK) nümayəndələri Birləşmiş Millətlər Təşkilatı (BMT) Avropa İqtisadi Komissiyasının (AİK) Mənzil Təsərrüfatı və Əmlak İdarəçiliyi Komitəsinin 74-cü sessiyasında iştirak etmişlər.
ƏMDK-dan AZƏRTAC-a bildirmişlər ki, sessiya Cenevrə şəhərində yerləşən BMT-nin Millətlər Sarayında təşkil edilmişdir. Sessiya ilə yanaşı, AİK regionunun mənzil təsərrüfatı, şəhər quruculuğu və daşınmaz əmlak idarəçiliyi üzrə nazirlərinin görüşü də keçirilmişdir.
BMT Avropa İqtisadi Komissiyasının bu tədbirlərində 56 üzv dövlətin nazirləri və yüksək səviyyəli nümayəndələri iştirak etmişlər. Bu ildən ƏMDK-ın nümayəndəsi BMT Avropa İqtisadi Komissiyasının Daşınmaz Əmlak İdarəçiliyi üzrə İşçi Qrupuna sədrlik edir.
Sessiyada Mənzil Təsərrüfatı və Əmlak İdarəçiliyi Komitəsinin vəzifə və funksiyaları, 2012-2013-cü illər üçün İş Planının icrası ilə bağlı dayanıqlı mənzil təsərrüfatçılığı, enerji baxımından səmərəli mənzil istismarı məsələləri müzakirə edilmişdir. Eyni zamanda, şəhərlərin inkişafı ilə əlaqədar infrastrukturun düzgün qurulması, şəhərlərdə demoqrafik inkişaf tendensiyaları və digər məsələlər müzakirə mövzusu olmuşdur.
Tədbirlər çərçivəsində AİK regionunun mənzil təsərrüfatı, şəhər quruculuğu və daşınmaz əmlak idarəçiliyi üzrə nazirlərinin görüşü təşkil edilmişdir. Görüşə sədrlik edən ƏMDK-ın sədr müavini Rafiq Cəlilov çıxış edərək, Azərbaycanda son illər həyata keçirilən genişmiqyaslı iqtisadi islahatlar, quruculuq işləri və ölkə iqtisadiyyatının müxtəlif sahələrini əhatə edən inkişafdan bəhs etmişdir. Eləcə də, daşınmaz əmlakın idarə edilməsi sahəsində əldə edilmiş uğurlar, əmlakın qeydiyyatının müasirləşdirilməsi və daha da şəffaflaşdırılması, prosedurların sadələşdirilməsi, müddətlərin qısalması, modern idarəetmə sistemlərinin və elektron xidmətlərin tətbiqi vurğulanmışdır. Sədr müavini daşınmaz əmlakın vahid kadastrı və dövlət reyestrinin aktual məsələləri, ünvan reyestrinin yaradılması, sosial-iqtisadi layihələr, eləcə də bununla əlaqədar beynəlxalq əməkdaşlıq sahəsində həyata keçirilən ardıcıl tədbirlər barədə geniş məlumat vermişdir.
Görüş zamanı AİK-in üzv dövlətlərindən olan nazirlər, habelə dövlət məmurları öz ölkələrində son illər ərzində əldə edilmiş nailiyyətlər, uğurlu fəaliyyətlər, həmçinin iqtisadi inkişaf yolunda qarşılaşdıqları çətinliklər və gələcək gözləntilər barədə çıxışlar etmişlər.
BMT Avropa İqtisadi Komissiyasının Daşınmaz Əmlak İdarəçiliyi üzrə İşçi Qrupuna sədrlik edən komitə nümayəndəsi 74-cü sessiyanın daşınmaz əmlak idarəçiliyi bölməsində AİK regionunda daşınmaz əmlak idarəçiliyi sahəsində son bir il ərzində İşçi Qrupu tərəfindən görülmüş işlər barədə təqdimatla çıxış etmişdir. Müzakirələr zamanı İşçi Qrupun hesabat dövründə həyata keçirdiyi elmi-tədqiqat layihələrinin gedişi, təşkil edilmiş seminar və işçi müşavirələr barədə çıxışlar olmuş, bu tədbirlərin mahiyyəti, məqsədi və nəticələri barədə geniş məlumatlar verilmişdir. Daha sonra İşçi Qrupun 2014-2015-ci illər üçün İş Planının layihəsi müzakirə olunmuş, növbəti tədbirlər açıqlanmışdır.
Sonra AİK-in Mənzil Təsərrüfatı və Əmlak İdarəçiliyi Komitəsinin 74-cü sessiyası çərçivəsində nazirlərin görüşünün nəticələri müzakirə edilmiş, 2014-2015-ci illər üçün mənzil təsərrüfatı, şəhər quruculuğu və daşınmaz əmlak idarəçiliyi sahələrini ehtiva edən İş Planı geniş müzakirəyə çıxarılaraq təsdiq edilmişdir. Müzakirələr bitdikdən sonra Mənzil Təsərrüfatı və Əmlak İdarəçiliyi Komitəsinin bürosu seçilmişdir. Azərbaycan Respublikası adından ƏMDK-ın nümayəndəsi Avropa İqtisadi Komissiyasının Mənzil Təsərrüfatı və Əmlak İdarəçiliyi Komitəsinin bürosuna üzv seçilmişdir.
Bölmənin digər xəbərləri
