- Zati-aliləri,

Hörmətli qonaqlar,

Xanımlar və cənablar!

Mən bu gün hörmətli qonağımızı, Azərbaycan Respublikasının Prezidenti cənab İlham Əliyevi salamlamaqdan olduqca məmnunam. Ölkəmiz mədəniyyətlərin qovuşuğunda yerləşir və sərmayələr ilə biliklər sahəsində regional mərkəzə çevrilmişdir. Paytaxt şəhərimiz isə, dünya xəritəsində çoxəsrlik tarixi, dini köklərə və ənənələrə malik bir şəhər kimi tanınır. Regionumuzun ən inkişaf edən ölkəsi olan İordaniya öz vətəndaşlarının rifahı üçün çalışır. Şəhərimizin bələdiyyəsi mədəni dəyərləri və tarixi irsini qoruyub saxlayaraq, əhaliyə keyfiyyətli xidmətlər göstərməkdədir. Qarşımızda qoyduğumuz ən əsas məqsəd şəhər sakinləri üçün münasib həyat şəraitini təmin etməkdən ibarətdir. Paytaxt əhalisinin rifahının yüksəlməsi bizim üçün ümdə məsələdir. Biz həyata keçirdiyimiz layihələrdə ictimaiyyətin iştirakını təmin etməyə çalışırıq. Bu işlərə, əsasən, gəncləri cəlb edirik, çünki onlar şəhərimizin gələcəyidir. Onlar Əmman şəhərinin gələcək inkişaf planlarının tərtibinə töhfə verirlər. Biz həmçinin ətraf mühit, mədəni irsin qorunması, nəqliyyat və infrastrukturun inkişafı, sərmayə qoyuluşu və şəhər əhalisinin artması ilə bağlı yaranan məsələləri həll edirik.

Bələdiyyəmiz hər kəsin iştirakına açıq olan şəffaf şəhərsalma planının formalaşması prosesinə sadiqdir. Dövlət sektorunun və özəl sektorun tələbatları şəffaf formada nəzərə alınır. “Əmman şəhəri inkişaf edən canlı orqanizm kimi” şüarını rəhbər tutaraq, şəhərin inkişafı və şəhərsalma planlarının həyata keçirilməsi qarşımızda duran mürəkkəb məsələlərdir. Əmman öz xüsusiyyəti ilə seçilən şəhərdir.

Ölkəmizi və paytaxtımızı xüsusi səciyyələndirən amil İordaniya xalqıdır. Ölkəmizə pənah gətirmiş ailələr, dostlarımız və qonşularımız müxtəlif dini və mədəni köklərə malik şəxslərdir. Məhz bu amil ölkəmizi və Əmmanı xüsusi məkana çevirir. Sivilizasiyanın qədim tarixi, paytaxt şəhərimizin formalaşması, çoxmədəniyyətlilik, müxtəliflik vətənimizə xas meyarlardır.

Ümid edirik ki, bugünkü tarixi səfər çərçivəsində Bakı ilə Əmman arasında imzalanmış sənəd nəticəsində təcrübə mübadiləsi edərək, xalqlarımızın rifahına daha yaxından xidmət göstərəcəyik.

Mən eyni zamanda, məmnunluqla məlumat verirəm ki, Əmman şəhərinin əsas küçələrindən birinə Azərbaycanın keçmiş Prezidenti Heydər Əliyevin adı verilmişdir. Allah ona rəhmət eləsin!

Cənab Prezident!

Hörmətli qonaqlar!

Mən sizi bir daha Əmman bələdiyyəsində salamlayır, diqqətinizə görə minnətdarlığımı bildirirəm.

X X X

Sonra Əmman şəhərinin tarixi və bu günü, eləcə də ulu öndərin adı verilmiş prospektlə bağlı film göstərildi.

Dövlətimizin başçısı mərasimdə çıxış etdi.