Enerji Alternativlərinin Uzunməqsədli Planlaşdırılması Sistemi üzrə treninq keçirilir
Bakı, 29 aprel, AZƏRTAC
Ekologiya və Təbii Sərvətlər Nazirliyinin təşkilatçılığı və BMT İnkişaf Proqramının dəstəyi ilə Milli Hidrometeorologiya Departamentinin mütəxəssislərinə Enerji Alternativlərinin Uzunməqsədli Planlaşdırılması Sistemi (LEAP) üzrə treninqlərin keçirilməsinə başlanılıb.
Nazirliyin mətbuat xidmətindən AZƏRTAC-a bildiriblər ki, beş gün davam edəcək və Azərbaycanda ilk dəfə tətbiq olunacaq “LEAP” proqram təminatı sistemi üzrə treninq həmin təşkilatın eksperti Taylor Binninqton tərəfindən keçirilir.
Stokholm Ətraf Mühit İnstitutu tərəfindən hazırlanmış proqram təminatı sistemi olan LEAP modelinin əsas funksiyası iqlim dəyişmələrinin təsirinin azaldılmasının qiymətləndirilməsi və enerji siyasətinin təhlilindən ibarətdir.
“LEAP” hazırda istilik effekti yaradan qazların təsirlərinin azaldılmasının qiymətləndirilməsini və enerji resurslarının inteqrə olunmuş planlaşdırılmasını, həmçinin Aşağı Emissiya İnkişafı Strategiyalarını (LEDS) həyata keçirən bir çox dövlətlərin, xüsusən də inkişaf etməkdə olan ölkələrin istifadə etdikləri effektiv proqram təminatıdır. Model uzun müddətdir ki, dünyada ekologiya və energetika üzrə ixtisaslaşmış təşkilatlar tərəfindən istifadə olunur.
Qeyd edək ki, nazirlik ekologiyanın müxtəlif sahələri üzrə kadr potensialının gücləndirilməsi, beynəlxalq təcrübənin tətbiq edilməsi istiqamətində fəaliyyətini davam etdirir.
Bölmənin digər xəbərləri
