Ərdəhan Universitetinin konfrans zalına Qarabağ müharibəsi şəhidi Mustafa Kərimovun adı verilib
Ərdəhan, 7 noyabr, AZƏRTAC
Noyabrın 7-də Türkiyənin Ərdəhan Universitetinin İqtisadiyyat və inzibati elmlər fakültəsinin konfrans zalına bu ali təhsil ocağının məzunu və 44 günlük Qarabağ müharibəsinin şəhidi Mustafa Kərimovun adının verilməsi mərasimi keçirilib.
AZƏRTAC xəbər verir ki, tədbirdə şəhidin ailə üzvləri, Milli Məclisin deputatları Anar İsgəndərov və Şahin İsmayılov, Azərbaycanın Qarsdakı baş konsulu Zamin Əliyev, Xəzər Universitetinin prorektoru Dilbər Zeynalova, Ərdəhan valiliyinin nümayəndələri, Ərdəhan Universiteti, Qafqaz Universiteti (Qars), İğdır Universitetinin rəhbərliyi, Türkiyə təhlükəsizlik qüvvələrinin və Müdafiə Nazirliyinin əməkdaşları, tələbələr və hər iki qardaş ölkədən ictimaiyyət nümayəndələri iştirak ediblər.
Mərasim iştirakçıları Azərbaycan və Türkiyə qəhrəmanlarının xatirəsini bir dəqiqəlik sükutla yad ediblər.
Türkiyə və Azərbaycanın Dövlət himnləri səsləndirilib.
Azərbaycanın Vətən müharibəsində tarixi Qələbəsinin beşinci ildönümünə həsr olunmuş videoçarx və şəhid Mustafa Kərimovun Ərdəhan Universitetində tələbə olduğu dövrə aid fotoşəkillər nümayiş etdirilib.
Tədbiri açan Ərdəhan Universitetinin Tarix fakültəsinin müəllimi Volkan Özkan, Azərbaycanın qəhrəmanlarından birinin universitetdə təhsil alması ilə fəxr etdiyini bildirib. “Mustafa Kərimov yaxşı tələbə idi və universitetin müxtəlif tədbirlərində fəal iştirak edirdi. Onun xatirəsi Ərdəhan Universitetinin divarları arasında əbədi yaşayacaq”, - deyən müəllim, həmçinin şəhidin adının əbədiləşdirilməsi təşəbbüsünü dəstəklədikləri üçün universitet Senatının üzvlərinə təşəkkür edib.
Ərdəhan Universitetinin prorektoru Zafer Aykanat şəhidin ailə üzvlərinə təşəkkürünü bildirib. O qeyd edib ki, valideynlər oğullarını ölkələrinin layiqli vətənpərvəri kimi böyüdüblər. Z. Aykanat əlavə edib ki, türkiyəlilər Türkiyə və Azərbaycan qəhrəmanları arasında heç bir fərq qoymurlar.
Şəhidin atası Mais Kərimov Ərdəhan Universitetinin zallarından birinə oğlunun adının verilməsi ideyasını dəstəklədiyinə görə universitet rəhbərliyinə təşəkkür edib.
Milli Məclisin Elm və təhsil komitəsinin sədri Anar İsgəndərov gəncləri Azərbaycanın və Türkiyənin hərbi tarixini unutmamağa çağırıb. “Azərbaycan həmişə Türkiyənin köməyinə tələsib. Çanaqqala döyüşündə və bütün sonrakı dövrlərdə, o cümlədən 2023-cü ilin fevral zəlzələsindən sonra belə olub. Türkiyə oğulları da Azərbaycanın köməyinə gəliblər. 1918-ci ildə Bakını daşnak və bolşeviklərdən azad edən Qafqaz İslam Ordusu əsgərlərinin qəhrəmanlığını unutmayacağıq”, - deyə Milli Məclisin deputatı bildirib.
A. İsgəndərov qeyd edib ki, bu gün ölkəmiz uğrunda canlarından keçən türk əsgərləri də Azərbaycandakı Şəhidlər xiyabanında uyuyurlar. “Biz Azərbaycan və Türkiyə şəhidləri ilə fəxr edirik və Qələbə sevincinə görə Prezident, Ali Baş Komandan İlham Əliyevə və Azərbaycan əsgərlərinə səmimi-qəlbdən təşəkkür edirik. Həmçinin Türkiyəyə və onun Prezidenti Rəcəb Tayyib Ərdoğana Azərbaycanın haqq işini qətiyyətlə dəstəklədiklərinə görə minnətdarıq”, - deyən millət vəkili Vətən müharibəsi zamanı Azərbaycan məktəblilərinin hər iki qardaş ölkənin bayraqlarını çantalarında daşıdıqlarını xatırladıb.
Milli Məclisin Gənclər və idman komitəsinin sədri Şahin İsmayılov çıxışında Türkiyə, Azərbaycan və bütün Türk dünyasının maraqları naminə birliyə çağırıb. O qeyd edib ki, Azərbaycan xalqı noyabrın 8-də Vətən müharibəsində tarixi Qələbənin beşinci ildönümünü geniş şəkildə qeyd edəcək.
Deputat Türkiyə ilə Azərbaycan arasında əməkdaşlığın təhsil də daxil olmaqla bütün sahələrdə inkişaf etdiyini diqqətə çatdırıb. “Türkiyə şirkətlərinin Azərbaycanın azad edilmiş ərazilərinin bərpasında fəal iştirak etməsi sevindirici haldır”, - deyə millət vəkili bildirib və ölkələrə ortaq məqsədlərinə çatmaqda davamlı uğurlar arzulayıb.
Azərbaycan səfirliyinin təhsil müşaviri Nəcibə Nəsibova tələbələri şəhidlərin qəhrəmanlığını ehtiramla yad etməyə və xatırlamağa, ölkələrinin əsl vətənpərvəri olmağa və Azərbaycan ilə Türkiyə arasındakı dostluğun sarsılmazlığını unutmamağa çağırıb.
Ankaradakı Azərbaycan səfirliyinin hərbi attaşesinin köməkçisi polkovnik Polad Süleymanov şəhidin ailəsinə və dostlarına onu qəhrəman kimi böyütdüklərinə görə təşəkkür edib.
Azərbaycanın Qarsdakı baş konsulu Zamin Əliyev müasir Azərbaycanın yüksək beynəlxalq nüfuza malik güclü bir dövlət olduğunu qeyd edib. O vurğulayıb: “44 günlük müharibədə qazanılan Qələbə xalqımızın minlərlə oğlunun həyatı bahasına əldə edildi. Şəhidlər təkcə Azərbaycanın deyil, bütün regionun tarixində yeni bir səhifə yazdı, sülh və sabitliyə yol açdılar”.
Daha sonra Ərdəhan Universitetinin Mustafa Kərimov adına konfrans zalının açılışını bildirən lent kəsildi.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
