Ərdoğan: Türkiyə meşə yanğınları ilə mübarizədə PUA-lardan istifadə etməklə Avropada lideridir
Ankara, 3 iyun, AZƏRTAC
“Türkiyə meşə yanğınları ilə mübarizədə pilotsuz uçuş aparatlarından istifadə edən Avropa ölkələri siyahısına başçılıq edir. Həmin bu göstəriciyə görə, ölkəmiz dünyada ikinci yerdədir”.
AZƏRTAC xəbər verir ki, bu barədə Türkiyə Prezidenti Rəcəb Tayyib Ərdoğan Ankaranın Etimesqut Hava Limanında ekoloji tədbirin iştirakçılarına müraciət edərək bildirib.
O qeyd edib ki, hökumətin səyləri nəticəsində son 23 ildə ölkədə meşə massivlərinin sahəsi 23,4 milyon hektara çatıb ki, bu da Türkiyə ərazisinin 30 faizinə bərabərdir.
“Meşələr Türkiyənin ən böyük sərvətlərindən biridir. Meşə yanğınları ilə əhatə olunan bütün ərazilərdə operativ şəkildə ağac tingləri əkilir. 2002-ci ildən ölkəmizdə 7,5 milyarddan çox ting əkilib”, - deyə dövlət başçısı iqlim dəyişikliyi ilə bağlı problemlərə diqqət çəkib.
Prezident xatırladıb ki, ötən ilin orta temperaturu son 145 ildə ən yüksək göstərici olub. “Cari ilin daha da isti olacağı gözlənilir”, - deyə Ərdoğan bildirib.
Onun sözlərinə görə, hazırda Türkiyənin meşə yanğınları ilə mübarizə strukturlarının balansında 1786 ədəd texnika, 105 helikopter, həmçinin təyyarə və PUA var. Eyni zamanda, lazım gələrsə, ölkədə yanğınlarla mübarizə aparan könüllülərin sayı tez bir zamanda 130 min nəfərə çata bilər.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
