Ərəbistan səhralarında müşahidə olunan toz burulğanı Bakının havasını çirkləndirmişdir
Bakı, 5 aprel (AZƏRTAC). Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamentinin əməkdaşları tərəfindən Bakı şəhərinin atmosfer havasının çirklənmə səviyyəsinin yoxlanılması məqsədi ilə aparılan monitorinqin nəticələrinə görə hazırda havada olan tozun miqdarı normadan 1,5-2,5 dəfə çoxdur.
ETSN-dən AZƏRTAC-a verilən məlumata görə, bunun əsas səbəbi Ərəbistan səhralarında toz burulğanının atmosferin yuxarı təbəqələrinədək qalxmasıdır. Bu toz hissəcikləri atmosferin yer səthinə yaxın olan qatları üzrə hava cərəyanlarının cənub, cənub-qərb axınları ilə Azərbaycana da gəlib çatmışdır.
Nazirliyin mütəxəssislərinin fikrincə, aprelin 5-də gecə və səhər saatlarında zəif küləyin əsməsi atmosfer havasında tozun səpələnməsinin və çoxalmasının qarşısını ala bilməmişdir. Ancaq aprelin 6-da zəif cənub, cənub-şərq küləyi arabir güclənən şimal-qərb küləyi ilə əvəz olunacaqdır ki, bu da atmosfer havasında toplanmış toz hissəciklərinin azalması üçün əlverişli şərait yaradacaqdır. Gözlənilən yağışlı hava şəraiti isə qısa bir müddətdə çirklənməni minimuma endirəcəkdir.
Bölmənin digər xəbərləri
