Ermənistan regionda sülh və sabitliyə təhdid olan Dağlıq Qarabağ münaqişəsinin həllinə tələsməlidir
Bakı, 27 dekabr, AZƏRTAC
Argentinanın aparıcı elektron qəzetlərindən olan “Infobae” Azərbaycanın bu ölkədəki səfiri Məmməd Əhmədzadənin məqaləsini yayıb. Azərbaycanlı diplomat bu məqaləsi ilə Daşnaksutyun partiyasının nümayəndəliyi olan Cənubi Amerika Erməni Milli Şurasının direktoru Lukas Koussikianın bir müddət əvvəl həmin qəzetdə yayılmış, Ermənistan-Azərbaycan, Dağlıq Qarabağ münaqişəsini təhrif edən və ölkəmizlə bağlı təxribatçı fikirləri əks etdirən yazısına cavab verib.
Xarici İşlər Nazirliyinin mətbuat xidmətindən AZƏRTAC-a verilən məlumata görə, səfir yazır ki, erməni mənşəli müəllifin məqaləsi Ermənistanın Azərbaycana qarşı hərbi təcavüzünü ört-basdır etmək üçün Dağlıq Qarabağ münaqişəsi və Azərbaycanla bağlı erməni tərəfinin dezinformasiyasının bariz nümunəsidir.
M.Əhmədzadə Dağlıq Qarabağın tarixi Azərbaycan torpağı və Azərbaycan Respublikasının beynəlxalq səviyyədə tanınmış ərazisi olduğunu, qondarma “Dağlıq Qarabağ respublikası”nın isə Ermənistan tərəfindən qeyri-qanuni yaradılmış oyuncaq rejim olduğunu bildirir. O, həmçinin ermənilərin Dağlıq Qarabağda yerləşdirilməsinin, habelə Azərbaycanın tərkibində Dağlıq Qarabağ Muxtar Vilayətinin yaradılmasının tarixindən bəhs edir.
Məqalədə deyilir: “SSRİ-nin dağılmasından sonra Ermənistan silahlı qüvvələri Azərbaycan ərazisinin 20 faizini təşkil edən Dağlıq Qarabağ və ona bitişik yeddi rayonu işğal edib, həmin torpaqlardan azərbaycanlıları qovub və beynəlxalq humanitar hüququ pozaraq dinc azərbaycanlı əhaliyə qarşı qətliamlar, o cümlədən Xocalı soyqırımını törədib”.
BMT və digər beynəlxalq təşkilatların münaqişə ilə bağlı mövqeyini qeyd edən diplomat həmin təşkilatların Dağlıq Qarabağın Azərbaycanın tərkib hissəsi olduğunu təsdiqlədiyini, Azərbaycan ərazisindən Ermənistanın hərbi qüvvələrinin çıxarılmasını və məcburi köçkünə çevrilmiş azərbaycanlıların öz yurdlarına qayıtmasını tələb etdiyini bildirir. Beynəlxalq birliyin bu mövqeyinin rəsmi Yerevan tərəfindən inkar edildiyini vurğulayan M.Əhmədzadə noyabrın 12-də Ermənistanın hərbi helikopterlərinin Azərbaycanın hava məkanına qeyri-qanuni soxulmasının bu ölkənin təcavüzünün davam etməsinin bariz göstəricisi olduğunu vurğulayır. Azərbaycanın torpaqlarını işğal edən Ermənistanın Qlobal Hərbiləşdirmə İndeksinə görə dünyada üçüncü ən çox hərbiləşdirilmiş ölkə olduğunu bildirən diplomat rəsmi Bakının BMT Nizamnaməsinin 51-ci maddəsinə istinad edərək öz ərazi bütövlüyünü bərpa etmək hüququnu özündə saxladığını və müdafiə sektorunu gücləndirdiyini vurğulayır.
Səfir hazırda Ermənistanda hakimiyyətdə olan hərbi diktatura rejiminin rəhbərlərinin əvvəllər Dağlıq Qarabağdakı separatçılara rəhbərlik etmiş, azərbaycanlı mülki əhaliyə qarşı qətliamlar, o cümlədən Xocalı soyqırımını törətmiş, sonradan isə Ermənistanda öz dinc vətəndaşlarına qarşı qətllər və terror həyata keçirərək hakimiyyəti qəsb etmiş və Ermənistanı dünyada ən geridə qalmış ölkələrdən birinə çevirmiş şəxslər olduğunu vurğulayır.
Məqalədə bildirilir ki, Ermənistanın ağır problemlərinin həlli yalnız regionun iqtisadiyyatının 80 faizini təşkil edən Azərbaycanla əməkdaşlıqdan asılıdır. Ermənistan regionda sülh və sabitliyə ən başlıca təhdid olan bu münaqişənin nizamlanmasına tələsməlidir. Bu xüsusda, Ermənistan qoşunlarının işğal olunmuş ərazilərdən çıxarılması və azərbaycanlı məcburi köçkünlərin öz torpaqlarına qaytarılması vacibdir.
Bölmənin digər xəbərləri
