CƏMİYYƏT
Ərzaqlıq kartof məhsulunda karantin tətbiq edilən orqanizm aşkar olunub
![Ərzaqlıq kartof məhsulunda karantin tətbiq edilən orqanizm aşkar olunub](/files/2023/3/1200x630/17023819694408438756_1200x630.jpg)
Bakı, 12 dekabr, AZƏRTAC
“Lars 77” MMC-nin müraciəti əsasında Belarus Respublikasından idxal olunan ərzaqlıq kartof məhsulundan nümunələr götürülərək Qida Təhlükəsizliyi İnstitutunun müvafiq laboratoriyasına təqdim edilib.
Bu barədə AZƏRTAC-a Qida Təhlükəsizliyi Agentliyinin İnformasiya təminatı və innovativ həllər şöbəsindən məlumat verilib.
Müayinələr nəticəsində ümumi çəkisi 20 min 980 kiloqram ərzaqlıq kartof məhsulu partiyasında karantin tətbiq edilən orqanizm - kartofun qonur çürüməsi, ümumi çəkisi 20 min 450 kiloqram ərzaqlıq kartof məhsulu partiyasında isə karantin tətbiq edilən orqanizm - kartof yumrularında halqavari bakterial çürümə aşkar edilib.
Faktla bağlı qanunvericiliyə uyğun olaraq istehlaka yararsız məhsulun gömrük ərazisinin hüdudlarından kənarlaşdırılması, məhv edilməsi və ya utilizasiyası barədə qərar qəbul edilib.