Ərzurum rəsədxanasında dördmetrlik müasir teleskop quraşdırılacaq
Ərzurum, 23 fevral, AZƏRTAC
Tezliklə Türkiyənin şimal-şərqində regionun ən müasir teleskoplarından biri quraşdırılacaq ki, bu da ölkənin kosmik proqramına daha bir töhfə verəcək.
AZƏRTAC xəbər verir ki, bu barədə Türkiyənin sənaye və texnologiya naziri Mehmet Fatih Kacır məlumat verib.
Nazirin sözlərinə görə, diametri dörd metr olan teleskop Ərzurum vilayətində tikilməkdə olan Şərqi Anadolu Rəsədxanasının ərazisində fəaliyyət göstərəcək.
“Yeni rəsədxana yaxın vaxtlarda istifadəyə veriləcək ki, bu da ölkəmizin kosmos sahəsində tədqiqatlarını inkişaf etdirəcək”, - deyə nazir bildirib.
F.M.Kacır müasir Türkiyənin yerli kosmik və peyk texnologiyalarını inkişaf etdirən dövlətlər sırasında olduğunu vurğulayıb. O əlavə edib: “Ölkəmiz təkcə öz peyklərini yaratmır, həm də kritik altsistemlərin, o cümlədən elektron-optik kameraların inkişafı üçün proqramlar hazırlayır”.
Nazir iyirmi il əvvəl Türkiyənin yalnız xarici tərəfdaşların dəstəyi ilə peyk proqramları hazırlaya bildiyini və “TürkSat” peykinin orbitə buraxılmasından sonra daxili istehsalın inkişafına önəm verildiyini xatırladıb.
“Onun ardından RASAT, “Göktürk” və nəhayət, sırf türk mühəndisləri tərəfindən yaradılmış ilk uzaqdan zondlama peyki İMECE gəldi. Növbəti mərhələdə yerli telekommunikasiya peykləri də kosmik fəzaya göndəriləcək”, -deyə Kacır qeyd edib.
Bölmənin digər xəbərləri
