EUROMED VƏ BİOSİS ÖZƏL KLİNİKALARINA XƏBƏRDARLIQ EDİLMİŞDİR
Səhiyyə nazirliyinin mətbuat xidmətindən AZƏRTAC-ın müxbirinə bildirmişlər ki, yoxlamalar zamanı hər iki mərkəzdə bəzi çatışmazlıqlar aşkara çıxarılmışdır. Tibbi sənədləşdirmə Səhiyyə Nazirliyi və Dövlət Statistika Komitəsinin təsdiq etdiyi vahid qeydiyyat standartlarına cavab verməmiş və həmin tibb müəssisələrində hazırlanmış blanklarda aparılmışdır. Euromeddə xəstələrin diaqnozları, laboratoriya və diaqnostika tədqiqatlarının nəticələri qeydiyyata alınmamış, Nazirlər Kabinetinin işə qəbul haqqında qərarının müddəalarına riayət olunmamışdır. Hər iki müəssisədə Standartlaşdırma, Metrologiya və Patent üzrə Dövlət Agentliyinin istifadə olunan avadanlıq üçün rəyləri yoxdur. Euromedə məxsus aptekdə müddəti ötmüş dərman preparatlarının və Səhiyyə Nazirliyinin İnnovasiyalar və Təchizat Mərkəzində qeydiyyata alınmamış dərmanların satışı aşkara çıxarılmışdır.
Yol verilən bütün nöqsanları nəzərə alaraq, hər iki müəssisənin rəhbərliyinə xəbərdarlıq edilmiş və çatışmazlıqları aradan qaldırmaq üçün 10 gün möhlət verilmişdir.
Bölmənin digər xəbərləri
