Fahrettin Altun: Afrika Qərb mediasında dezinformasiyaya əsaslanan bir çərçivədə təqdim olunur
İstanbul, 28 fevral, Günel Karatepe, AZƏRTAC
Qlobal media sisteminin həqiqət və ədalət prinsiplərinə əsaslanaraq işləməsi lazımdır. Afrika qlobal mediada öz səsi ilə və ən doğru şəkildə təmsil olunmalıdır. Biz Afrikanın yalnız müharibələr, xəstəliklər kimi mənfi tərəflərlə deyil, onun real potensialı və dinamikası ilə tanıdılmasını istəyirik. Təəssüf ki, bu gün Qərb media sistemi içərisində Afrika əksər hallarda birtərəfli, qərəzli, stereotiplərlə dolu, manipulyativ və dezinformasiyaya əsaslanan bir çərçivədə təqdim olunur. Bunun qarşısını almaq üçün mübarizəmizi davam etdiririk.
AZƏRTAC xəbər verir ki, bu fikirləri Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Fahrettin Altun İstanbulda keçirilən Türkiyə-Afrika Media Forumunda çıxışı zamanı ifadə edib. F.Altun bildirib ki, dünyada ədalətsiz bir sistemin dəyişdirilməsi istiqamətində Türkiyə Prezidentinin “Daha ədalətli bir dünya mümkündür” və “Dünya beşdən böyükdür” çağırışları tarixdən gələn ədalət və azadlıq səsinin əks-sədasıdır: “Biz də bu prinsipə sadiq qalaraq Afrika ölkələrinin daxili işlərinə müdaxilə etmək əvəzinə vasitəçilik rolumuzla qitədə sülhün, ədalətin və azadlığın bərqərar olmasına töhfə verməyə çalışırıq. Prezidentimizin lider diplomatiyasındakı uğuru və Türkiyənin vasitəçilik bacarığı, ölkəmizi Afrikada sabitləşdirici bir güc kimi mövqeləndirir”.
O, Türkiyənin “Afrikanın problemlərinə afrikalı həllər” tapmağa çalışdığını vurğulayaraq, media və kommunikasiya sahəsində də bu yanaşmanı əsas götürdüklərini qeyd edib.
Türkiyə ilə Afrika ölkələri arasında artan əhatəli münasibətlərə toxunan F.Altun deyib: Türkiyə Prezidenti Rəcəb Tayyib Ərdoğan indiyə qədər 31 Afrika ölkəsinə 50-dən çox səfər edib. Bu yüksəksəviyyəli səfərlər Türkiyənin Afrika qitəsinə verdiyi əhəmiyyətin, strateji əlaqələri qarşılıqlı fayda (qazan-qazan) prinsipi əsasında davam və inkişaf etdirmə istəyinin açıq göstəricisidir. Digər təsirli göstəricilərdən biri isə Afrikadakı Türkiyənin diplomatik nümayəndəlikərinin sayındakı artımdır. Türkiyənin 2002-ci ildə Afrikada cəmi 12 səfirliyi var idi, bu gün isə bu rəqəm 44-ə çatıb. Ankaradakı Afrika səfirliklərinin sayı isə 2008-ci ildə 10 olduğu halda, hazırda 38-ə yüksəlib”.
F.Altun Türkiyənin Afrika qitəsi ilə ticarət, investisiya, təhsil, mədəniyyət, təhlükəsizlik və hərbi əməkdaşlıq kimi bir çox sahədə güclü əlaqələr qurduğunu və bunu davam etdirdiyini bildirib.
“İndiyə qədər hüquqi baza infrastrukturunu gücləndirmək üçün Afrika ölkələrindən 49-u ilə ticarət və iqtisadi, 32-si ilə investisiyaların qarşılıqlı təşviqi və qorunması, 17-si ilə ikiqat vergitutmanın qarşısının alınması, 35-i ilə hərbi, 21-i ilə hərbi təhsil, 29-u ilə müdafiə sənayesi üzrə əməkdaşlıq sazişləri imzalanıb. Türkiyə humanitar yardımlar və inkişaf layihələri ilə Afrikanın sabitliyini gücləndirir”, - deyə departamentin rəhbəri bildirib.
Türk Hava Yollarının bu gün Afrikada 41 ölkəyə və 62 şəhərə uçuşlar həyata keçirdiyini, bunun da Türkiyə ilə Afrika arasındakı əlaqələri gücləndirdiyini, qarşılıqlı mədəni əlaqələri artırdığını vurğulayan F.Altun Maarif Vəqfinin bölgədə təhsil sahəsində mühüm təşəbbüslər həyata keçirdiyini və FETÖ ilə mübarizə aparmaqda qətiyyətli addımlar atdığını deyib.
Bölmənin digər xəbərləri
