FAO QARAMALIN TAUN XƏSTƏLİYİ ÜZƏRİNDƏ QƏLƏBƏ QAZANILDIĞINI ELAN ETMƏK NİYYƏTİNDƏDİR
Bakı, 1 dekabr (AZƏRTAC). Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) bildirmişdir ki, yaxın 18 ayda FAO və Dünya Heyvanların Sağlamlığı Təşkilatı qaramalın taun xəstəliyi üzərində qələbə qazanıldığını rəsmən elan edəcəkdir. FAO-nun press-relizində deyilir: “Bəşər tarixində ilk dəfə olaraq heyvanların xəstəliyinə qalib gələ bilmişik”. Press-relizdə qeyd edilir ki, minilliklər boyu taun xəstəliyi nəticəsində milyonlarla heyvan tələf olmuşdur. Nəticədə ciddi iqtisadi itkilər baş vermiş, aclıq yayılmışdır. Bu təhlükəli xəstəliyə qarşı mübarizə məqsədilə 1994-cü ildə FAO çərçivəsində həyata keçirilməyə başlanılmış taun xəstəliyinə qarşı mübarizə üzrə Qlobal Proqram sayəsində beynəlxalq birlik taun xəstəliyinin yayılmasının qarşısını almaq və onun virusunu məhv etmək üçün tədbirlər işləyib hazırlamaq, xəstəliyin kökünün kəsilməsinə yönəlmiş səyləri artırmaq imkanı əldə etmişdir.
Lakin 2000-ci illərin əvvəlində Cənubi Somali ərazisində, eləcə də Efiopiyanın və Keniyanın Cənubi Somaliyə bitişik hissələrində heyvanların müəyyən populyasiyalarının qanında taun izləri yenidən aşkar edilmişdir. Xəstəliyin geniş yayılması halı axırıncı dəfə 2001-ci ildə Keniyada qeydə alınmışdır. FAO xəbər verir ki, taun infeksiyasının sonuncu mənbəyi çox güman ki, artıq tamamilə təmizlənmişdir. Təşkilat ümid edir ki, qaramalın taun xəstəliyi üzərində qlobal miqyasda qələbə qazanılması xəbəri yaxın vaxtlarda elan ediləcəkdir.
Bölmənin digər xəbərləri
