Fərid Qayıbov: Azərbaycan Atıcılıq Federasiyası son iki ildə xeyli irəliləyişə nail olub
Bakı, 5 sentyabr, AZƏRTAC
Bakıda ikinci dəfə atıcılıq üzrə dünya çempionatı keçirildi. Yarışda 60-dan çox ölkə iştirak etdi.
Bu sözləri AZƏRTAC-a açıqlamasında gənclər və idman naziri Fərid Qayıbov Bakının atıcılıq üzrə mundiala ev sahibliyi etməsi barədə danışarkən deyib.
Nazir Azərbaycan Atıcılıq Federasiyasının yarışı yüksək şəkildə təşkil etdiyini bildirib: “Dünya çempionatında həm güllə, həm də stend atıcılığı üzrə yarışlar keçirildi. Bu format dörd ildən bir baş tutur. Yarışda 1200-dən çox idmançı qüvvəsini sınadı. Təşkilatçılıq yüksək səviyyədə idi. Ümumiyyətlə, atıcılıq federasiyası son iki ildə xeyli irəliləyişə nail olub”.
Fərid Qayıbov yarışda yüksək nəticələrə imza atan yerli idmançıları təbrik edib: “İstərdik ki, bundan sonra uğurlu nəticələrimizin sayı daha da artsın. Əvvəllər bu idman növündə nəticələrimiz aşağı idi. Lakin hazırda gənc idmançılarımız bizi öz uğurları ilə sevindirməyi bacarırlar. Səbirli olmalıyıq. İnanıram ki, bu idman növündə çox yaxşı nəticələrimiz olacaq”.
Bölmənin digər xəbərləri
