FİNLANDİYADA LİSEY TƏLƏBƏSİ 10 YOLDAŞINI QƏTLƏ YETİRMİŞDİR
AZƏRTAC-ın xüsusi müxbiri Frans-Press agentliyinə istinadla xəbər verir ki, sentyabrın 23-də Finlandiya liseylərinin birində faciə baş vermişdir. Ölkənin paytaxtından 360 kilometr qərbdə yerləşən Kauhayoki liseyinin tələbəsi odlu silahdan atəş açaraq 11 sinif yoldaşını qətlə yetirmiş və iki tələbəni isə ağır yaralamışdır.
Bələdçi və restoran xidməçisi hazırlayan liseydə təhsil alan 20 yaşlı Matti Yuhani Saari bu qanlı faciəni törətdikdən sonra özünə qəsd etmişdir. Ağır vəziyyətdə xəstəxanaya aparılarkən qatil yolda keçinmişdir.
Hadisə 14 minlik əhalisi olan şəhərin sakinlərini şok vəziyyətinə salmışdır. Sakinlər bildirmişlər ki, Matti bir neçə həftə öncə odlu silahdan atəş açmağı sınaqdan keçirirmiş. Yerli polisin bu barədə məlumatı olmuş və silahı almaq barədə təşəbbüs göstərməmiş, 11 nəfərin dünyasını dəyişməsi ilə nəticələnmiş qanlı faciə baş vermişdir.
Şahidlərin dediyinə görə, qatil ilk atəşi açarkən yerli polis hadisə yerinə gəlsə də, liseyə daxil ola bilməmişdir. Canini zərərsizləşdirmək üçün xüsusi təyinatlı dəstəni çağırmağa məcbur olmuşlar.
Ölkənin Baş naziri hadisə ilə bağlı bəyanatında baş verənlərdən təəssüf hissi keçirdiyini bildirmişdir.
Ötən ilin noyabrında ölkənin Tuusula liseyində də belə qanlı hadisə olmuşdur. 18 yaşlı lisey tələbəsi 8 yoldaşını qətlə yetirmişdir. Həmin dövrdə hökumət baş vermiş hadisəyə qəti münasibət bildirməmiş, ölkədə odlu silah satışı ilə bağlı qərara dəyişiklik edilməsinə cəhd göstərməmişdir.
Xatırladaq ki, Finlandiya əhalidə olan silahın sayına görə Amerika Birləşmiş Ştatlarından və Yəməndən sonra dünya ölkələri arasında üçüncü yerdədir.
Bölmənin digər xəbərləri
