Firdovsi Umudov: Dünya kubokundan əvvəl ilk üçlükdə qərarlaşmağı planlaşdırmışdıq
Bakı, 20 fevral, AZƏRTAC
İranın Kirmanşah şəhərində keçirilən sərbəst güləş üzrə dünya kuboku yarışlarında bürünc medal qazanan yığma komandamızın üzvləri Vətənə qayıdıblar.
AZƏRTAC xəbər verir ki, Heydər Əliyev Beynəlxalq Aeraportunda yığma komandanın baş məşqçisi Firdovsi Umudov media nümayəndələrinin suallarını cavablandırıb və qazanılan uğurun ilk növbədə ölkəmizin qələbəsi olduğunu bildirib.
Güləşçilərimizin turnirdə inamla mübarizə apararaq böyük uğur qazandıqlarını vurğulayan baş məşqçi deyib: “Bildiyiniz kimi, “A” qrupunda biz çox güclü güləş ölkələri - Rusiya, ABŞ və Gürcüstan komandaları ilə mübarizə apardıq. Rusiya və Gürcüstan komandalarını məğlub etdikdən sonra ABŞ idmançıları ilə qarşılaşdıq. Yarışdan əvvəl biz ilk üçlükdə qərarlaşmağı planlaşdırmışdıq. İdmançılarımızın uğurlu çıxışlarından sonra qızıl medalları qazanmağa daha çox ümid bəslədik. Ancaq ABŞ komandası ilə görüşdə 74 kiloqram çəki dərəcəsində yarışda hakimlərin ədalətsizliyi ilə üzləşdik. Görüşün başa çatmasına bir dəqiqə qalmış ardıcıl üç xəbərdarlıqla Murad Süleymanova texniki məğlubiyyətin verilməsi görüşün nəticəsinə ciddi təsir etdi. Dünya kuboku mənim baş məşqçi təyin olunduğum məşqçilər korpusunun 2017-ci ildə ilk ciddi yarışı idi. Bu, bizim hamımızın birlikdə əldə etdiyimiz nəticədir. Bu nailiyyət həm də Azərbaycan Güləş Federasiyası rəhbərliyinin komandamıza göstərdiyi diqqətin nəticəsidir”.
Heyətdə əsasən gənc və təcrübəsi az olan güləşçilərə yer verdiklərini bildirən baş məşqçi komandanın hər bir üzvünün əzmkarlıq nümayiş etdirdiyini xüsusi vurğulayıb.
“Dövlətimizin və federasiya rəhbərliyinin qarşımıza qoyduğu tələblərdən biri “Tokio-2020” üçün ehtiyat qüvvənin formalaşdırılmasıdır. Bu məqsədlə heyətdə Hacı Əliyev, Cəbrayıl Həsənov, Georgi Edişeraşvili, Şərif Şərifov və Cəmaləddin Məhəmmədov kimi təcrübəli güləşçilərimizlə yanaşı, Mahir Əmiraslanov, Əli Rəhimzadə, Məhəmməd Müslümov, David Suynuçxanov, Murad Süleymanov, Nurməhəmməd Hacıyev, Aslanbek Alborov kimi gənc güləşçilərə də yer vermişdik. Onlar da özlərini yaxşı göstərə bildilər. Yarışda 61 kiloqram çəki dərəcəsində mübarizə aparan Əli Rəhimzadə Rusiya ilə görüşdə Olimpiya çempionu Camal Otarsultanovu məğlub etdi. ABŞ ilə qarşılaşmada isə dünya çempionuna 11:12 hesabı ilə uduzdu. Müəyyən səhvlər var idi, əsasən də təcrübəsizlik. Onların üzərində gələcəkdə işləyəcəyik. Dünya kubokunda 97 kiloqram çəki dərəcəsində mübarizə aparan Aslanbek Alborov ABŞ komandası ilə görüşdə Rio Olimpiadasının qalibi Kayl Snayderi məğlub etdi. Güləşçilərimizin hər birini təbrik edir, onlara təşəkkür edirəm”, - deyə Firdovsi Umudov bildirib.
Azərbaycan Prezidenti İlham Əliyevin Sərəncamına əsasən, 2017-ci ilin ölkəmizdə “İslam Həmrəyliyi İli” elan edilməsinin əhəmiyyətindən danışan yığma komandanın baş məşqçisi bildirib: “Qarşıda bizi IV İslam Həmrəyliyi Oyunları, Avropa çempionatı kimi mötəbər yarışlar gözləyir. Təqvim planımız olduqca gərgin və sıxdır. Çalışacağıq ki, etimadı, güləş azarkeşlərinin ümidlərini doğruldaq və daha yaxşı nəticələr qazanaq. Gənc və peşəkar komandamızla birlikdə hələ çox nailiyyətlər qazanacağıq. Qarşımızda böyük hədəflər var. Bu hədəflərə nail olmaq üçün var-gücümüzlə çalışacağıq”.
Bölmənin digər xəbərləri
