Fransa hökuməti anomal istilərlə bağlı iclas çağırıb
Paris, 29 iyun, AZƏRTAC
Fransanın Baş naziri Sebastyan Lökornü ölkəni bürümüş anomal istilik dalğasının nəticələrini qiymətləndirmək və gələcək risklərə hazırlığı gücləndirmək məqsədilə bu gün böhran iclası keçirəcək.
AZƏRTAC xəbər verir ki, iclas zamanı səhiyyə naziri Stefani Ristin istilik dalğasının sağlamlığa təsiri ilə bağlı yeni hesabat təqdim edəcəyi gözlənilir.
Hökumət, həmçinin əmək bazarı, təhlükəsizlik, nəqliyyat və digər sahələrdə yaranmış problemləri təhlil edərək, böhran dövründə görülən tədbirlərin effektivliyini qiymətləndirəcək. İclasda elektrik şəbəkələrinin dayanıqlığı, xəstəxanaların soyutma sistemlərinin gücləndirilməsi və digər vacib məsələlər də müzakirə olunacaq. Bu çərçivədə Fransa hökuməti səhiyyə müəssisələri üçün 30 min kondisionerin sifariş edildiyini və onların yaxın həftələrdə xəstəxanalara çatdırılacağını açıqlayıb.
Qeyd edək ki, Ümumdünya Səhiyyə Təşkilatının məlumatına görə, Avropada anomal isti hava səbəbindən artıq 1300-dən çox insan həyatını itirib. Fransada isə İctimai Səhiyyə Agentliyi ötən çərşənbədən bəri əvvəlki aylarla müqayisədə təxminən 1000 əlavə ölüm halı qeydə alıb. Mütəxəssislər bu rəqəmin yaxın günlərdə daha da arta biləcəyini istisna etmirlər.
Bölmənin digər xəbərləri
