Fransa ilə Əlcəzair arasında münasibətlər daha da pisləşir
Paris, 16 aprel, AZƏRTAC
Fransa və Əlcəzair arasında gərginlik daha da artıb. Rəsmi Paris 12 fransızın Əlcəzairdən qovulmasına qarşılıqlı cavab verib.
AZƏRTAC xəbər verir ki, Prezident Emmanuel Makron Fransanın Əlcəzairdəki səfiri Stefan Romateni məsləhətləşmələr üçün geri çağırmaq, eləcə də Əlcəzairin diplomatik nümayəndəliklərində çalışan 12 nəfəri bu ölkədən çıxarmaq qərarına gəlib. “Fransa Əlcəzair hakimiyyətinin qərarını təşviş hissi ilə qarşılayır, bunu əsassız və anlaşılmaz hesab edir”, - deyə məlumatda bildirilir.
Yelisey sarayı Əlcəzair rəsmilərinin ikitərəfli münasibətlərin qəfil pisləşməsinə görə məsuliyyət daşıdığını diqqətə çatdırır. "Biz cavab veririk. Həmişə dialoq olmalıdır, lakin birtərəfli yox", - deyə vurğulanır.
Fransanın TF1 televiziya kanalında Fransa səfirinin geri çağırılması Əlcəzairin gördüyü tədbirə etiraz kimi qiymətləndirilir və fransızların tezliklə ölkəyə qayıdacaqları qeyd edilir.
Fransanın bəzi siyasətçiləri isə gərginliyin yaranmasına daxili işlər naziri Brüno Rötayanın səbəb olduğunu söyləyirlər. B.Rötayo isə 12 əlcəzairlinin ölkədən çıxarılmasını məqsəduyğun hesab etdiyini deyir.
Qeyd edək ki, bazar günü Fransada əlcəzairlilərin, o cümlədən konsulluq nümayəndəsinin həbsinə cavab olaraq, bu ölkənin 12 təmsilçisinə Əlcəzair ərazisini 48 saat ərzində tərk etmək əmri verilib. Bu gərginlik Fransa Prezidenti Emmanuel Makron ilə əlcəzairli həmkarı Abdelmacid Tebbun arasında münasibətləri yaxşılaşdırmaq məqsədilə baş tutmuş telefon danışığından iki həftə sonraya təsadüf edir.
Bölmənin digər xəbərləri
