Fransa telekanalında Azərbaycanın qlobal böhranları müsbət idarə etməsindən danışılıb VİDEO
Paris, 14 may, AZƏRTAC
Fransanın “BFM TV” telekanalı vasitəsilə yayımlanan “Inside” verilişində Azərbaycanda iqtisadi vəziyyət və COVID-19 epidemiyasının, eləcə də neft böhranının iqtisadiyyata təsirləri və nəticələri barədə məlumat verilib.
AZƏRTAC xəbər verir ki, verilişdə Fransanın “SUEZ” şirkətinin Qafqaz və Mərkəzi Asiya ölkələri üzrə regional direktoru, Fransa Xarici Ticarət Şurasının Cənubi Qafqaz üzrə prezidenti Alən Karbonel danışıb. Ölkəmizdə innovativ layihələrdə iştirak etdiklərini bildirən A.Karbonel karbohidrogen məhsullarının qiymətinin kəskin aşağı düşməsinə baxmayaraq, Azərbaycanın neft böhranına müqavimətinin güclü olduğunu deyib.
O qeyd edib ki, Azərbaycan sanitar və neft böhranına məruz qalıb, ancaq hər iki böhran yüksək dərəcədə idarə olunur. Azərbaycan dövləti tərəfindən sanitar böhranla bağlı vaxtında və çox yaxşı preventiv tədbirlər görülməsi nəticəsində COVID-19 epidemiyasının təsirləri çox olmayıb. Azərbaycanda virusun yayılması aşağı səviyyədədir. Sanitar böhranla bağlı hökumətin nəzarəti güclüdür.
Neftin qiymətinin aşağı düşməsindən söz açan A.Karbonael bildirib ki, “MEDEF International” və Azərbaycanın İqtisadiyyat Nazirliyinin birgə təşkil etdiyi onlayn görüşdə İqtisadiyyat naziri Mikayıl Cabbarov neft böhranının təsirlərindən danışıb və ölkə iqtisadiyyatının bu böhrana müqavimət imkanlarından, neft böhranının iqtisadiyyata təsirinin böyük olmadığını qeyd edib. Nazir investisiya layihələrinin davam etdirilməsi ilə bağlı narahatlığın olmadığını bildirib.
“SUEZ” şirkətinin Cənubi Qafqaz üzrə prezidenti ölkəmizdə məşğulluğun saxlanması məqsədilə sahibkarlığa və müəssisələrə dövlət yardımından söz açıb. İqtisadiyyatın yenidən dirçəldilməsi sahəsində dövlətin planlarından nəqliyyat və rəqəmsal sahələrin inkişafından danışıb.
Diqqətə çatdırılıb ki, Azərbaycan Prezidentinin göstərişi ilə ölkə iqtisadiyyatının neftdən asılılığının azaldılması məqsədilə neçə ildir iqtisadiyyatın şaxələndirilməsinə böyük önəm verilir, bu istiqamətdə dövlət proqramları həyata keçirilir və tədbirlər görülür.
O iqtisadiyyatın neft, neft-kimya sənayesi, kənd təsərrüfatı sahələrində fəaliyyətin davam etdiyini vurğulayıb. COVID-19 epidemiyası ilə bağlı turizm sahəsində durğunluq yaransa da, iki aydan sonra turizmin bərpa olunacağını qeyd edib.
Xatırladaq ki, Alən Karbonel “MEDEF International”ın internet səhifəsində bundan əvvəldə Azərbaycanda mövcud vəziyyətlə bağlı məlumat vermişdi.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
