Fransa vergi orqanı Bernard Arnodan 22,5 milyon avro əlavə vergi tələb edir
Paris, 6 iyul, AZƏRTAC
Fransanın ən varlı iş adamı, “LVMH” qrupunun rəhbəri Bernard Arno ilk dəfə irihəcmli vergi düzəlişi ilə üzləşib.
AZƏRTAC xəbər verir ki, “L'Informé” nəşrinin məlumatına görə, Fransa vergi xidməti ondan ümumilikdə 22,5 milyon avro əlavə vergi və ödəniş tələb edir.
Nəşrin iddiasına əsasən, Bernard Arno “LVMH” daxilində mürəkkəb maliyyə və holdinq strukturlarından istifadə etməklə vergi yükünü azaltmaqda şübhəli bilinir. Bildirilir ki, Arno ailəsi lüks məhsullar istehsal edən qrupa birbaşa deyil, bir-birinə bağlı holdinq şirkətləri vasitəsilə nəzarət edir. “LVMH” qrupu “Louis Vuitton”, “Fendi”, “Guerlain”, “Givenchy”, “Christian Dior”, “Bulgari”, “TAG Heuer”, “Chaumet”, “Moët & Chandon”, “Dom Pérignon”, “Château d'Yquem”, “Le Bon Marché”, “Sephora” and “DFS” kimi şirkətlərdən ibarətdir.
Məlumata görə, bu strukturun ən yuxarı hissəsində Belçikada qeydiyyatdan keçmiş “Pilinvest” şirkəti dayanır və məhz bu mexanizm milyarderin vergi öhdəliklərini azaltmasına imkan verib.
İddialara əsasən, Bernard Arno 2010-cu il üzrə təxminən 13 milyon avro sosial sığorta ödənişini tam ödəməyib. Bundan əlavə, onun 2012-2015-ci illər dövrü üzrə sərvət vergisi çərçivəsində daha 9,5 milyon avro ödəməli olduğu bildirilir.
Bernard Arno bu ittihamları uzun müddətdir rədd edir və vergi orqanının qərarından şikayət etmək üçün Fransanın Dövlət Şurasına (Conseil d'État) müraciət edib. İş üzrə yekun qərarı ali inzibati məhkəmə verəcək.
Bölmənin digər xəbərləri
