Fransada aqressiv idarəetməyə görə tətil çağırışı edilib
Paris, 20 fevral, AZƏRTAC
Fransada məktəblərdə qış tətilinin başlanğıcı ərəfəsində dəmir yolu nəqliyyatında mümkün aksiyalar narahatlıq yaradıb.
AZƏRTAC xəbər verir ki, “Sud Rail” həmkarlar ittifaqı tərəfindən 20, 21 və 22 fevral tarixləri üçün cənub-şərq TGV şəbəkəsində tətil öncəsi bildiriş təqdim olunub.
Milli Dəmir Yolları Şirkətinin (SNCF) məlumatına görə, söhbət əsasən Parisdəki Lyon vağzalından (Gare de Lyon) hərəkət edən qatar reyslərindən gedir.
Tətil çağırışı bələdçi heyəti tərəfindən irəli sürülüb. Onlar əmək şəraitinin pisləşdiyini bildirərək rəhbərliyi aqressiv idarəetmə və məhsuldarlıq naminə təzyiqdə ittiham edirlər. Həmkarlar ittifaqı, həmçinin şəhərlərarası perimetr üzrə bütün qatar bələdçilərini 20 fevral saat 12:00-dan 23 fevral saat 08:00-dək aksiyaya qoşulmağa çağırıb. Bu təşəbbüsə Ümumi Əmək Konfederasiyası (CGT) dəstək verib.
“Sud Rail” digər həmkarlar təşkilatlarını da aksiyaya qoşulmağa çağırıb və tələblər yerinə yetirilməyəcəyi təqdirdə növbəti həftəsonlarında da tətili yeniləmək hüququnu saxladığını bəyan edib.
Bununla belə, SNCF rəhbərliyi həftəsonu üzrə dəmir yolu hərəkətində “xüsusi narahatlıq” görmədiyini və vəziyyətin nəzarət altında olduğunu açıqlayıb. Şirkət sərnişinləri rəsmi məlumatları izləməyə və səfər öncəsi qatar cədvəllərini yoxlamağa çağırır.
Hazırda tərəflər arasında danışıqların davam etdiyi bildirilir. Tətilin real təsirinin isə yaxın günlərdə bəlli olacağı gözlənilir.
Bölmənin digər xəbərləri
